Државната изборна комисија денеска ја одржа 17-тата седница, на која точка на дневниот ред беше заклучувањето на Избирачкиот список за Предвремените избори за градоначалник на Општина Брвеница.
Во функција на спроведување на изборите за градоначалник на Општина Брвеница, а согласно член 52 и член 31 став (2), точка 2 и од Изборниот законик, а врз основа на завршениот јавен увид и доставените податоци од Државниот завод за статистика, Државната изборна комисија едногласно донесе Одлука за заклучување на Избирачкиот список за предвремените избори за градоначалник на Општина Брвеница.
Според донесената одлука, Избирачкиот список за Општина Брвеница се заклучува со вкупно 16.256 гласачи запишани во Избирачкиот список. Од нив, во изводите од Избирачкиот список се запишани 15.798 избирачи , во посебниот извод од Избирачкиот список за лицата кои согласно евиденцијата на надлежен орган се на привремена работа или престој во странство, се запишани 449 избирачи додека 9 избирачи се запишани во посебниот извод од Избирачкиот список за лица кои за време на изборите се наоѓаат на издржување казна затвор или се во притвор. Со ова, Државната изборна комисија навремено заврши уште една клучна активност согласно предвидениот Роковник за извршување на изборните дејствија за спроведување на Предвремените избори за градоначалник на Општина Брвеница кои ќе се одржат на 18 октомври 2026 година.
ДРЖАВНА ИЗБОРНА КОМИСИЈА
