Државната изборна комисија на 16.04.2026 година, во полн состав ја одржа 3-та седница на која едногласно беа донесени неколку клучни акти насочени кон унапредување на внатрешните стандарди за работа и зајакнување на институционалните капацитети.

Во рамки на дневниот ред беа усвоени процедурите за прекувремена работа и исплата на додатоци на плата, како и процедурата за отсутност од работните простории, со што институцијата ги формализира досегашните позитивни практики и воспоставува прецизни механизми за евиденција и вреднување на трудот согласно современите стандарди. Како точка на дневен ред беше усвоен и Акцискиот план за унапредување на родовата перспектива (РАП) 2026 – 2028 година, стратешки документ за интегрирање на принципите на инклузивност и за унапредување на институционалната култура, професионалните стандарди и инклузивноста на изборниот процес во Република Северна Македонија.

Во насока на зајакнување на административната подготвеност, Комисијата ја донесе и Програма за обуки на раководството и вработените во Државната изборна комисија, со План за обуки од областа на заштита на личните податоци за 2026 година. Овој акт произлегува од законските обврски за целосно усогласување со домашните прописи и европската Регулатива (GDPR).

Под точката „Разно“, претседателот на ДИК, Бојан Маричиќ, го отвори прашањето за доцнењето и нецелосната исплата на надоместоците на членовите на изборните органи за Локалните избори 2025 година од страна на дел од општините. Во своето излагање, тој потенцираше дека согласно Изборниот законик, одговорноста за исплата на овие средства е исклучива обврска на општините и на Градот Скопје. Истовремено укажа дека ДИК е единствениот орган надлежен за донесување на Правилникот за надоместоци, поради што секоја самостојна одлука на локалните власти за негово ревидирање или намалување на износите е законски неоснована и ништовна.

Со цел надминување на состојбата во општините со блокирани сметки, Комисијата веќе презеде конкретни чекори и се обрати до Министерството за финансии и до Владата за изнаоѓање соодветен механизам за обезбедување на потребните средства. Маричиќ рече дека Државната изборна комисија останува ангажирана за надминување на проблемот и најави дополнителна координација со раководството на ЗЕЛС и градоначалниците на дел од општините, со цел изнаоѓање заедничко решение за итно исплаќање на надоместоците и целосна заштита на законските права и достоинството на сите граѓани вклучени во изборниот процес.

ДРЖАВНА ИЗБОРНА КОМИСИЈА

Присуството и вклученоста на раководството на ДИК на овој настан ја потврдува стратешката определба на Комисијата за заштита на веродостојноста на изборните процеси од надворешни влијанија и дезинформациски кампањи. На настанот, врвни домашни и меѓународни експерти, меѓу кои и претставници од ОБСЕ/ОДИХР и Службата за комуникации на Владата на Обединетото Кралство, дискутираа за потребата од мобилизација многу порано пред одржувањето на самите избори, нагласувајќи ја потребата од рана вклученост на сите засегнати институции. Експертот од ОБСЕ/ОДИХР, Франческа Богери, посочи е неопходно институциите да започнат со следење на овие појави многу порано, со цел да се овозможи навремена комуникација и координација.

За Државната изборна комисија, развојот на отпорност кон ваквите влијанија е клучен дел од зајакнувањето на институционалниот капацитет. Учеството во дискусијата овозможи размена на искуства за британскиот модел „РЕЗИСТ“ (RESIST), како и за моделите на координација што би можеле да се применат во националниот контекст со цел заштита на слободната волја на граѓаните и демократскиот дискурс.

Настанот беше организиран во рамките на проектот „Зајакнување на оперативната подготвеност на Владата за одговор на СММИ во Северна Македонија“, поддржан од Британската амбасада во Скопје.

ДРЖАВНА ИЗБОРНА КОМИСИЈА

Државната изборна комисија (ДИК) изразува сериозна загриженост во однос на доцнењето и нецелосната исплата на надоместоците за членовите на изборните органи за Локалните избори 2025 година од страна на одредени скопски општини и апелира до градоначалниците и до Заедницата на единиците на локалната самоуправа (ЗЕЛС) за доследно почитување на законските одредби при реализацијата на овие исплати.

Иако илјадници граѓани својата задача ја извршија професионално, одговорно и во согласност со највисоките стандарди, недозволиво е тие сè уште да се соочуваат со нерегулирани обврски или со обиди за незаконско намалување на предвидените износи. Во таа насока, ДИК упатува јасно укажување дека секоја одлука на општините со која самостојно се ревидира висината на надоместоците е правно неоснована и ништовна.

Единствениот орган надлежен за донесување на Правилникот за надоместоци е Државната изборна комисија, согласно членот 31 од Изборниот законик. Овој акт е задолжителен за сите субјекти и неговото селективно применување претставува директно кршење на законот и го урива достоинството на изборната администрација.

Иако најголемиот дел од општините во државата веќе ги исполнија своите законски обврски, загрижувачки е фактот што дел од скопските општини сè уште ја одложуваат оваа постапка, и покрај навремените укажувања за планирање на овие средства во општинските буџети уште од јули минатата година. Дополнително, потсетуваме дека согласно членот 88 став 4 од Изборниот законик, средствата за спроведување на локалните избори се обезбедуваат од општинските буџети.

Со цел заштита на правата на изборната администрација, што е клучно за интегритетот на секој изборен процес, како и спречување на дополнителни трошоци на товар на општинските буџети поради веќе најавени тужби од страна на членовите на изборните органи, ДИК иницира итна координативна средба со раководството на ЗЕЛС и градоначалниците на засегнатите општини, која треба да се одржи во текот на оваа недела со цел надминување на проблемите и изнаоѓање брзо решение за овој проблем.

ДРЖАВНА ИЗБОРНА КОМИСИЈА

Државната изборна комисија ја одржа својата 2-ра седница на која беа разгледани и едногласно усвоени повеќе акти клучни за оперативното и финансиското работење на институцијата, со посебен фокус на отчетноста и транспарентноста во трошењето на буџетските средства.

Комисијата едногласно го усвои Конечниот извештај за спроведените повторни избори за градоначалници во општините Гостивар, Врапчиште, Маврово и Ростуше и Центар Жупа од јануари 2026 година, заедно со финансискиот преглед, кој е законска обврска на Државната изборна комисија да го достави до Собранието на Република Северна Македонија и да го објави на својата веб-страница.

Како точка на дневниот ред беше усвоен и Годишниот извештај за завршната сметка на Државната изборна комисија за 2025 година, преку кој Комисијата дава детален увид во финансиското работење за изминатата изборна година. Според Извештајот, од вкупниот буџет за 2025 година во износ од 623.659.000,00 денари, реализирани се 559.531.966 денари, односно 89,72% од доделените средства. Анализата на трошоците покажува дека 75% од вкупниот буџет биле наменети за платено политичко рекламирање за локалните избори (64,14%) и надоместоци за изборната администрација (10,66%). Државната изборна комисија раководела совесно и одговорно со државните средства, при што се остварени значителни заштеди. Неискористените средства во износ од 981.752 евра се вратени во Буџетот на Република Северна Македонија.

На седницата беше донесена и Одлука за формирање на стручна работна група од надворешни ИКТ експерти, чиј фокус ќе биде техничката анализа, одржувањето и заштитата на Интегрираниот систем за биометриска идентификација. Со оваа Одлука се предвидува формирање три специјализирани експертски групи кои ќе ги покријат клучните аспекти на процесот: анализа на досегашните искуства, истражување на меѓународните практики и подготовка на потребните софтверски и хардверски предуслови за долгорочна функционалност и безбедност на системот.

Дополнително, беше усвоен Правилникот за критериумите за определување на надоместок на членовите на изборните органи и изборната администрација кои спроведувале гласање во казнено-поправните домови или установите за вонсемејна грижа, како и Правилникот за условите и начинот на користење на службена платежна картичка и средства за репрезентација. Со овие акти дополнително се уредуваат внатрешните процедури со цел обезбедување максимална професионалност и економичност во работењето.

Државната изборна комисија останува посветена на принципите на законитост и отчетност, продолжувајќи со транспарентното управување со ресурсите и во текот на 2026 година.

ДРЖАВНА ИЗБОРНА КОМИСИЈА

Претседателот на Државната изборна комисија (ДИК), Бојан Маричиќ, заедно со членовите на Комисијата, учествуваа на завршната конференција „Заштита на демократијата и изборниот интегритет: Мониторинг на злоупотребата на административните ресурси, политичкото рекламирање и кампањите на трети страни”, организирана од Меѓународната фондација за изборни системи (ИФЕС).

На конференцијата, која е дел од проектот BRIDGE финансиран од Владата на Обединетото Кралство и Швајцарската агенција за соработка, во фокус на панелите беа клучните ризици од злоупотреба на административните ресурси и влијанието на политичкото рекламирање врз интегритетот на изборните процеси.

Во рамки на дискусиите, претставниците на ДИК ја истакнаа посветеноста на институцијата во претстојниот период за зајакнување на механизмите за транспарентност и отчетност. Посебен акцент беше ставен на искуствата од Локалните избори 2025 година и потребата од континуирана дигитализација на процесите со цел заштитата на изборниот интегритет и спречувањето на каков било облик на злоупотреба на ресурсите.  Учеството на ДИК на овој настан е уште една потврда за долгогодишното и цврсто партнерство помеѓу ДИК и ИФЕС. Како институција, високо ја цениме нивната стратешка поддршка во клучните реформски процеси, особено во делот на дигитализација и градењето на капацитетите на изборната администрација, што е од суштинско значење за одржување на довербата во демократските процеси.

ДРЖАВНА ИЗБОРНА КОМИСИЈА

Новоименуваниот состав на Државната изборна комисија (ДИК) денеска, 11.02.2026 година, ја одржа 1-вата седница, на која беа разгледани и усвоени повеќе одлуки и заклучоци од Дневниот ред кои се однесуваат на тековното работење и техничката подготвеност на институцијата.

Со цел непречено извршување на специфичните активности кои бараат посебни технички знаења, ДИК донесе одлука за ангажирање надворешни експерти во работна група за ИКТ инфраструктура и обработка на Избирачкиот список. Претседателот Маричиќ појасни дека овој ангажман е наменски и проектно ориентиран, со цел одржување на највисоките безбедносни стандарди на базите на податоци, со ангажман на лицата до јули 2026 година. Дополнително, беше донесена и одлука за определување и исплата на надомест на две лица, ангажирани како помошни тела во подрачните одделенија и во ДИК за Локалните избори 2025 година, кои поради направен технички превид во претходната Одлука за определување и исплата на надомест на ангажираните лица за локалните избори 2025, биле изоставени.

Членовите на Комисијата едногласно го прифатија Известувањето по Нацрт-извештајот на Државниот завод за ревизија за 2024 година. Исто така, во рамките на законските обврски за усогласување на состојбите, беше усвоен и Извештајот за извршениот годишен попис на инвентар (опрема и друг вид на материјал) за 2025 година. Државната изборна комисија продолжува да дејствува како гарант за заштита на демократските процеси, потврдувајќи дека целосното почитување на принципите на транспарентност и одговорност останува основа за секоја донесена одлука.

ДРЖАВНА ИЗБОРНА КОМИСИЈА

Денес, по повод одбележувањето на Глобалниот ден на изборите, во просториите на Државната изборна комисија (ДИК) се одржа едукативна работилница со ученици од средните училишта на Град Скопје на која што преку интерактивен пристап учесниците се запознаа со значењето на изборите, избирачкото право и отпорноста кон дезинформациите.

Младите  во текот на работилницата имаа можност да разменат и да ги спртотивстават своите мислења, поврзани со важноста и неопходноста од нивна активна партиципација во изборите. Преку интерактивните активности, со  меѓусебни прашања за дилемите и веродостојноста на информациите кои секојдневно ги добиваат преку различни видови на медиуми, младите учесници одговорите ги добија од стручната служба на ДИК со цел да се создаде силна основа за нивно непречано учество во изборите.

„Активното учество на младите во изборниот процес е клучно за развој на одговорно и демократско општество. Затоа е важно да сте информирани и да знаете како функционира системот, како се спроведуваат изборите, како се гарантираат вашите права, и колкава е важноста на вашиот глас, рече претседателот на ДИК  Бојан Маричиќ.

Во своето обраќање претседателот на учесниците им порача дека демократијата се одржува, а не опстојува сама  по себе, ниту е дадена сама по себе, повикувајќи ги да бидат активни, да се информираат и да преземаат одговорност за заедницата и во креирањето на иднината на македонското општество.

Младите учесници ги поздрави и потпретседателот на Државната изборна комисија, Абдуш Демири, кој  потенцираше дека симболиката што ДИК ја прави денес е да се покаже местото на младите во демократијата и во развојот на општетствата преку нивното учество во изборниот процес, низ сите негови фази.

„Важно е младите да ја разберат улогата на Државната изборна комисија и изборниот процес, а наша задача е да отвориме можности да се стекнете со информиции кои ќе ве поттикнат да бидете информирани учесници во демократските процеси“, истакна потпретседателот на Државната изборна комисија, на работилницата на која присуствуваа сите членови на Комисијата.

Државната изборна комисија, со поддршка од Меѓународната фондација за изборни системи (ИФЕС). го одбележува Глобалниот ден на изборите со цел да даде поголема сила на значењето на овој ден потенцирајќи ја важноста на изборниот процес како темел на демократијата и упатувајќи порака за посветеноста на ДИК во обезбедување на интегритет и кредибилитет на изборите. Глобалниот ден на изборите за прв пат беше одбележан во 2005 година, кога изборни експерти од целиот свет се состанаа  со цел да го зајакнат развојот на демократијата на глобално ниво.

ДРЖАВНА ИЗБОРНА КОМИСИЈА

Државната изборна комисија (ДИК) успешно ја заврши постапката за ресертификација на ISO 9001:2015, меѓународниот стандард за системи за управување со квалитет. Оваа потврда е доказ за континуираната посветеност на ДИК кон ефикасност, транспарентност и професионалност во сите процеси поврзани со организирањето и спроведувањето на изборите.

ISO 9001:2015 стандардот гарантира дека институцијата применува најдобри практики за управување со квалитет, обезбедувајќи усогласеност со законските регулативи, подобрување на услугите и зголемување на довербата кај граѓаните и сите засегнати страни.

Ресертификацијата е резултат на систематска работа, редовни проверки и континуирано подобрување на процесите во согласност со меѓународните стандарди.

ДИК останува посветена на својата мисија – обезбедување фер, транспарентни и демократски избори, со највисок степен на квалитет и интегритет.

ДРЖАВНА ИЗБОРНА КОМИСИЈА

Согласно член 78-а став 5 и 6 од Изборниот законик („Службен весник на Република Македонија“, број 40/06, 136/08, 148/08, 155/08, 163/08, 44/11, 51/11, 54/11, 142/12, 31/13, 34/13, 14/14, 30/14, 196/15, 35/16, 97/16, 99/16, 136/16, 142/16, 67/17,125/17,35/18, 99/18,140/18, 208/18, 27/19 и „Службен весник на Република Северна Македонија“, број 98/19, 42/20, 74/21, 215/21, 58/24, 76/24 и 116/25), Државната изборна комисија спроведува ждрепка со која ќе ги распореди локациите на рекламните паноа и билборди кои се нудат за политичко рекламирање од страна на правните лица кои стопанисуваат со истите, а во врска со Повторни избори за градоначалник на општина Гостивар, градоначалник на општина Врапчиште, градоначалник на општина Маврово и Ростуша и градоначалник на општина Центар Жупа, 2026 година.

Се повикуваат претставниците на правните лица да достават понуди за рекламни паноа и билборди со локации и ценовници до Државната изборна комисија за Повторни избори за градоначалник на општина Гостивар, градоначалник на општина Врапчиште, градоначалник на општина Маврово и Ростуша и градоначалник на општина Центар Жупа, 2026 година., согласно Упатството за распределба на рекламни паноа и билборди по пат на ждрепка со број 10-691/1 од 03.03.2020 година, објавено на веб страната на Државната изборна комисија, најдоцна до среда, 17.12.2025 година, до 10:30 часот.

Максималниот број на рекламни паноа и билборди кои може да се користат за политичко рекламирање изнесува 50% од вкупниот број на територијата на определена општина, односно на територијата на кое определено правно лице стопанисува со истите за Повторни избори за градоначалник на општина Гостивар, градоначалник на општина Врапчиште, градоначалник на општина Маврово и Ростуша и градоначалник на општина Центар Жупа, 2026 година.

Ждрепката за распределба на рекламни паноа и билборди ќе се одржи во големата сала на четврти спрат на Државната изборна комисија на 17.12.2025 година во 12:30 часот.

Овластените лица на правните лица кои доставиле понуди за распределба на рекламни паноа и билборди кои ќе учествуваат во ждрепката потребно е со себе да имаат овластување од правното лице.

ДРЖАВНА ИЗБОРНА КОМИСИЈА