Со давањето свечена изјава во Собранието на Република Северна Македонија, официјално започна мандатот на новоизбраните членови на Државната изборна комисија. Според одлуката за избор на претседател, потпретседател и членови на Државната изборна комисија, Бр. 08-627/1, донесена на 28 јануари 2026 година, Собранието за претседател го избра Бојан Маричиќ, за потпретседател Абдуш Демири, додека за членови на Комисијата се избрани Александар Даштевски, Ангелчо Ристов, Светлана Карапетрова, Борис Кондарко и Дитмире Шеху.

Новиот претседател на Државната изборна комисија, Бојан Маричиќ, е дипломиран правник на отсекот за меѓународно право на Правниот факултет „Јустинијан Први“ во Скопје и магистер по европско и меѓународно право, кој зад себе има богато институционално искуство, како министер за правда и вицепремиер за европски прашања.

Државната изборна комисија брои седум членови, кои согласно законските одредби треба да се државјани на Република Северна Македонија со постојано живеалиште во земјата, да имаат високо образование со најмалку осум години работно искуство и да не се членови на органи на политички партии. Мандатот на членовите на Комисијата изнесува пет години, со право на реизбор.

Новиот состав на Државната изборна комисија беше изгласан од пратениците, со 83 гласа „за“ и без гласови „против“, откако на 15 јануари годинава им истече мандатот на досегашните членови на Државната изборна комисија, кој беше продолжен поради спроведување на дополнителни локални избори во четири општини.

Државната изборна комисија останува посветена на својата уставна и законска улога за обезбедување фер, слободни и демократски изборни процеси, во интерес на граѓаните и демократскиот развој на државата.

ДРЖАВНА ИЗБОРНА КОМИСИЈА

Државната изборна комисија ги известува овластените претставници на политичките партии, коалициите и групите избирачи кои ќе учествуваат на Повторни избори за градоначалник на општина Гостивар, градоначалник на општина Врапчиште, градоначалник на општтина Маврово и Ростуше и градоначалник на општина Центар Жупа 2026 година, дека ждрепката за утврдување на редоследот во единствената листа на кандидати ќе се одржи на 17.12.2025 година со почеток во 12:30 часот, во седиштето на Државната изборна комисија, голема сала, четврти  спрат.

ДРЖАВНА ИЗБОРНА КОМИСИЈА

Утре, на 21 ноември 2025 година започнува постапката за собирање на потписи за кандидирање на независни кандидати за градоначалници на општините Гостивар, Врапчиште, Маврово и Ростуше и Центар Жупа. Собирањето на потписите ќе се врши пред службените лица на надлежното  подрачно одделение и канцеларија на  Државна изборна комисија и пред надлежен нотар, секој работен ден во периодот на редовното работно време од 8:30 до 16:30 часот,  а последниот ден (30 ноември 2025) до 24:00 часот.

Подрачно одделение на Државна изборна комисја –  Гостивар е надлежно за собирање потписи за градоначалник на општините Гостивар, Маврово и Ростуше и Врапчиште а канцеларијата на Државна изборна комисија – Дебар е надлежна за собирање на потписи за градоначалник на општина Центар Жупа.

Постапката на собирање на потписи за независни кандидати за градоначалници на овие четири општини завршува на 30 ноември 2025 година во 24 часот.

Повторените избори за градоначалници на Гостивар, Врапчиште, Маврово и Ростуше и Центар Жупа се одржуваат поради непостигнат цензус на Локалните избори кои се одржаа на 19 октомври 2025 година поради што во овие општини не се избраа градоначалници.

ДРЖАВНА ИЗБОРНА КОМИСИЈА

Државната изборна комисија ги известува радиодифузерите, печатените медиуми и електронските медиуми (интернет портали), кои ќе обезбедуваат платено политичко рекламирање за учесниците во изборната кампања за Повторните избори за градоначалник на општина Гостивар, градоначалник на општина Врапчиште, градоначалник на општина Маврово и Ростуша и градоначалник на општина Центар Жупа во 2026 година, дека се должни да се регистрираат во Државната изборна комисија, во рок од 3 дена од денот на распишување на изборите.

Радиодифузерите, печатените медиуми и електронските медиуми (интернет портали) доставуваат „Барање за упис во регистар на радиодифузери, печатени медиуми и електронски медиуми (интернет портали) за Повторните избори за градоначалник на општина Гостивар, градоначалник на општина Врапчиште, градоначалник на општина Маврово и Ростуша и градоначалник на општина Центар Жупа во 2026 година“ до Државната изборна комисија, задолжително со прилог тековна состојба издадена од Централен регистар на Република Северна Македонија, не постара од 30 дена.

Барањата за упис со прилог тековна состојба се поднесуваат електронски на следната електронска адреса: [email protected] или во архивата на ДИК на бул.„Св. Кирил и Методиј“ бр.54, 1000 Скопје (најдоцна до 24:00 часот на 20 ноември 2025 година).
Врз основа на поднесените барања за упис, Државната изборна комисија ќе изготви „Регистар на радиодифузери, печатени медиуми и електронски медиуми (интернет портали) за Повторните избори за градоначалник на општина Гостивар, градоначалник на општина Врапчиште, градоначалник на општина Маврово и Ростуша и градоначалник на општина Центар Жупа во 2026 година“ кои ќе даваат услуги на платено политичко рекламирање за време на Повторните избори за градоначалник на општина Гостивар, градоначалник на општина Врапчиште, градоначалник на општина Маврово и Ростуша и градоначалник на општина Центар Жупа во 2026 година. Регистарот со уредно поднесени и прифатени барања за упис во регистар на радиодифузери, печатени медиуми и електронски медиуми (интернет портали) за Повторните избори за градоначалник на општина Гостивар, градоначалник на општина Врапчиште, градоначалник на општина Маврово и Ростуша и градоначалник на општина Центар Жупа во 2026 година ќе биде јавно објавен на интернет страната на Комисијата.

Радиодифузерите, печатените медиуми и електронските медиуми (интернет порталите) се должни во рок од пет дена од денот на распишувањето на изборите да утврдат ценовници за платено политичко рекламирање на учесниците во изборниот процес (најдоцна на 22 ноември 2025 година до 24:00 часот).

Радиодифузерите и печатените медиуми се должни ценовниците за секој медиум одделно за платено политичко рекламирање да ги применуваат и за време на изборната кампања и притоа просечната цена (аритметичка средина) по секунда за едно деноноќие добиена според различните ценовно-рекламни временски периоди и тоа: Период 1 – од 00:00 до 08:00 часот, Период 2 – од 08:00 до 16:00 часот и Период 3 – од 16:00 до 24:00 часот кај радиодифузерите за платено политичко рекламирање, како и цената за закуп на рекламен простор во печатениот медиум да не ја надминува вкупната просечна цена на рекламирање на секој радиодифузер одделно пресметана во последните пет изминати изборни циклуси одржани на ниво на цела територија на државата и тоа за Изборите за Претседател на Република Северна Македонија во 2024 година, Изборите за пратеници во Собранието на Република Северна Македонија 2024 година, Изборите за членови на советите на општините и советот на градот Скопје и за градоначалници на општините и за градоначалник на градот Скопје во 2021 година, Предвремени избори за пратеници во Собранието на Република Северна Македонија во 2020 година и Изборите за Претседател на Република Северна Македонија во 2019 година, а за електронските медиуми (интернет порталите) цената за закуп на рекламен простор на интернет порталот за платено политичко рекламирање да не ја надминува просечната цена за рекламирање пресметана, за последните пет изминати изборни циклуси.

За Радиодифузерите, печатените медиуми и електронските медиуми (интернет порталите) кои не учествувале на сите изминати 5 изборни циклуси цената за платено политичко рекламирање не може да ја надминува просечната цена на рекламирање пресметана во последните пет изминати изборни циклуси согласно Упатство за начинот и постапката за потврдување на просечно постигнатата цена за платено политичко рекламирање за радиодифузер, печатени медиуми и електронски портали (интернет портали) кои не учествувале на последните пет изборни циклуси донесено од страна на Државната изборна комисија со бр.08-441/1 од 14.02.2024 година.

Државната изборна комисија е должна да ги потврди и објави на нејзината веб страна доставените ценовници со просечно пресметаните цени утврдено од радиодифузерите и печатените медиуми, како и да ги објави ценовниците со цените утврдени од електронските медиуми (интернет порталите), согласно член 75-ѓ став (3) и (9) од ИЗ, во рок од 10 дена од истекот на рокот за доставување на ценовниците утврдени во ставот (3) на овој член.
Доколку Државната изборна комисија утврди неправилности во ценовниците од радиодифузерите и печатените медиуми го известува соодветниот медиум да изврши корекција на ценовникот во рок од 72 часа од приемот на известувањето.

Архивата на Државната изборна комисија ќе работи на прием на барања за упис во регистарот на радиодифузери, печатени медиуми и електронски медиуми (интернет портали) на ден 20.11.2025 година (четврток), до 24:00 часот.

Напомена: Во предвид ќе се земат само доставените барања за упис во Регистарот исклучиво на горенаведената електронска пошта [email protected] или до архивата на Државната изборна комисија.

Упатство за начинот и постапката за потврдување на просечно постигнатата цена за платено политичко рекламирање за радиодифузери, печатени медиуми и електронски портали (интернет портали) кои не учествувале на последните пет изборни циклуси

ДРЖАВНА ИЗБОРНА КОМИСИЈА

Заклучок за завршување на Локалните избори 2025 година

ДРЖАВНА ИЗБОРНА КОМИСИЈА

Денеска, на 18 октомври 2025 година, Државната изборна комисија одржа средба со претставници на меѓународни организации и државни изборни комисии кои ќе го набљудуваат спроведувањето на Локалните избори 2025 година во Република Северна Македонија.

ДИК им посака добредојде на набљудувачите и ги запозна со изборниот систем, моделот на гласање и начинот на организација на изборниот процес во државата. Притоа беше потенцирана посветеноста на Комисијата кон транспарентно, професионално и инклузивно спроведување на изборите.

На средбата присуствуваа претставници од следните институции и организации:

• Централна изборна комисија на Украина
• Канцеларија за демократски институции и човекови права на ОБСЕ (ОДИХР)
• Меѓународна фондација за изборни системи (ИФЕС)
• Државна изборна комисија на Молдавија
• Центар за обуки при Централната изборна комисија на Грузија
• Државна изборна комисија на Хрватска
• Врховен изборен совет на Република Турција
• Централна изборна комисија на Косово.

Во своето обраќање, Претседателот на ДИК, Борис Кондарко,  ја истакнаа важноста на меѓународната соработка и размената на искуства меѓу изборните администрации, како значаен придонес за унапредување на изборните процеси и зголемување на довербата на јавноста во изборниот систем.

ДИК изрази благодарност за интересот и поддршката од страна на меѓународните партнери и ја потврди својата целосна отвореност и подготвеност за соработка во текот на целиот изборен процес.

ДРЖАВНА ИЗБОРНА КОМИСИЈА

Предмет на Јавниот повик е организација на едукација за процесот на набљудување на изборите од страна на граѓански организации кои ќе изразат интерес да ги набљудуваат Изборите за градоначалници и членови на советите на општините и Градот Скопје, 2025 година. Организацијата на обуката е дел од Програмата за едукација на други чинители во изборниот процес за 2025 година, на Државната изборна комисија.

Се повикуваат сите заинтересирани граѓански организации кои се регистрирани согласно со закон, најмалку една година пред денот на одржувањето на изборите, а во чии статути е вклучено начелото на заштита на човековите права  и кои изразуваат интерес да ги набљудуваат претстојните избори, да учествуваат на обуката организирана од страна на Државната изборна комисија.

Секоја граѓанска организација може да номинира најмногу 2 ( двајца ) претставници кои ќе учествуваат на обуката. Во пријавата треба да се достави име и презиме на лицата кои ќе присуствуваат на обуката, мејл адреси и контакт телефонски броеви.

Обуката ќе се одржи на 03 октомври 2025 година (петок), од 10:00 до 12:30 часот во Хотел Парк ( конференциска сала Њу Јорк) ,  Скопје.

Заинтересираните граѓанските организации треба електронски да ги пријават своите претставници за обуката, на следната контакт адреса: observers@ sec.mk,  најдоцна до 30 септември 2025 година.

Бројот на учесници на обуката е ограничен на 30 учесници.

ДРЖАВНА ИЗБОРНА КОМИСИЈА

Согласно член 78-а став 5 и 6 од Изборниот законик („Службен весник на Република Македонија“, број 40/06, 136/08, 148/08, 155/08, 163/08, 44/11, 51/11, 54/11, 142/12, 31/13, 34/13, 14/14, 30/14, 196/15, 35/16, 97/16, 99/16, 136/16, 142/16, 67/17,125/17,35/18, 99/18,140/18, 208/18, 27/19 и „Службен весник на Република Северна Македонија“, број 98/19, 42/20, 74/21, 215/21, 58/24, 76/24 и 116/25), Државната изборна комисија спроведува ждрепка со која ќе ги распореди локациите на рекламните паноа и билборди кои се нудат за политичко рекламирање од страна на правните лица кои стопанисуваат со истите, а во врска со Избори за членови на советите на општините и советот на градот Скопје и за градоначалници на општините и за градоначалник на градот Скопје 2025 година.

Се повикуваат претставниците на правните лица да достават понуди за рекламни паноа и билборди со локации и ценовници до Државната изборна комисија за Избори за членови на советите на општините и советот на градот Скопје и за градоначалници на општините и за градоначалник на градот Скопје, согласно Упатството за распределба на рекламни паноа и билборди по пат на ждрепка со број 10-691/1 од 03.03.2020 година, објавено на веб страната на Државната изборна комисија, најдоцна до вторник, 23.09.2025 година, до крај на работното време, односно до 16:30 часот.

Максималниот број на рекламни паноа и билборди кои може да се користат за политичко рекламирање изнесува 50% од вкупниот број на територијата на определена општина, градот Скопје, односно на територијата на кое определено правно лице стопанисува со истите за Избори за членови на советите на општините и советот на градот Скопје и за градоначалници на општините и за градоначалник на градот Скопје 2025 година.

Ждрепката за распределба на рекламни паноа и билборди ќе се одржи во големата сала на 4-ти спрат на Државната изборна комисија на 24.09.2025 година во 13:00 часот.

Овластените лица на правните лица кои доставиле понуди за распределба на рекламни паноа и билборди кои ќе учествуваат во ждрепката потребно е со себе да имаат овластување од правното лице.

ДРЖАВНА ИЗБОРНА КОМИСИЈА

Државната изборна комисија, Државната комисија за спречување на корупцијата и Државниот завод за ревизија, денеска, на 16 септември 2025 година, во Скопје потпишаа Меморандум за соработка во пресрет на претстојните Локални избори, со што ја продолжуваат одличната професионална и стручна  соработка.

Со овој Меморандум трите институции ја зацврстуваат својата определба за непосредна соработка, координација и заемна помош при спроведување на одредбите за финансирање на изборната кампања, размена на информации и податоци, како и навремено постапување по утврдени неправилности.

Посебен акцент е ставен на транспарентноста во финансирањето на изборната кампања преку редовна размена на финансиски извештаи, како и на заеднички активности за унапредување на почитувањето на изборната регулатива со цел спроведување слободни, фер и демократски избори.

Меморандумот предвидува и меѓусебна соработка во делот на постапување по претставки, приговори и други постапки од заеднички интерес, консултации и размена на искуства, како и создавање и имплементација на заеднички проекти.

Со потпишувањето на овој документ, ДИК, ДКСК и ДЗР испраќаат јасна порака за нивната решителност да обезбедат кредибилен изборен процес и да ја зголемат довербата на граѓаните во институциите и изборите.

Меморандум за соработка со ДИК, ДКСК и ДЗР

ДРЖАВНА ИЗБОРНА КОМИСИЈА