Shkup, 16 shtator 2026 – Përfaqësimi formal i grave në proceset zgjedhore dhe politike në Maqedoninë e Veriut gradualisht po rritet, mirëpo fuqia e reale politike ende ngec mbrapa shifrave. Kjo është një nga mesazhet kryesore nga konferenca “Avancimi i pjesëmarrjes zgjedhore të grave nëpërmjet të dhënave, përfitimeve dhe partneriteteve”, që u mbajt në Shkup, e organizuar nga Komisioni Shtetëror i Zgjedhjeve, Misioni i OSBE-së në Shkup dhe “Programi për përkrahje zgjedhore” i Zvicrës.

Në konferencën fjalë kishin Abdush Demiri, nënkryetari i Komisionit Shtetëror të Zgjedhjeve, ambasadori Kilian Vall, shef i misionit të OSBE-së në Shkup, Kristof Somer, ambasadori i Zvicrës në Maqedoninë e Veriut dhe Kristofer Le Mon, nënkryetari për programe dhe strategji në IFES.

Megjithëse lista zgjedhore shfaq një barazi pothuaj të plotë demografike, ku dallimi është vetëm 500 femra në krahasim me meshkujt, megjithatë shifrat zbulojnë një hendek serioz gjinor në daljen nëpër komunat dhe rajonet. Prandaj, të dhënat statistikore nga kjo konferencë, për neve si institucion, janë një tregues i qartë për hapat e ardhshëm që duhet t’i ndërmarrë KSHZ-ja për mënjanimin e barrierave për realizimin e plotë dhe të papenguar të së drejtës së votës për secilën grua – theksoi nënkryetari i KSHZ-së, Abdush Demiri.

Në kuadër të konferencës, anëtarja e KSHZ-së, Ditmire Shehu e prezantoi statistikën nga dalja e votuesve nëpër komuna nga zgjedhjet lokale 2025, të ndara në bazë gjinore. Gjatë prezantimit të saj, ajo theksoi që nëpërmjet analizës së shifrave vërehen trendet, gjendja dhe mundësitë për veprim.Të dhënat nuk janë fundi i analizës, por fillimi i veprimit, konkludoi Shehu në fjalimin e saj. Të dhënat tregojnë që rritja e numrit të kandidateve nuk nënkupton automatikisht edhe rritje proporcionale të numrit të grave të zgjedhura.

Në panelin e parë që ishte i dedikuar politikave dhe masave stimuluese për rritjen e pjesëmarrjes së grave në zgjedhjet, u prezantuan përvoja ndërkombëtare dhe mundësi për inkorporimin e masave stimuluese financiare për pjesëmarrje më të madhe të grave në zgjedhje.. Si shembull u prezantua modeli i Moldavisë, ku stimujt financiarë në lidhje me numrin e grave të zgjedhura kanë kontribuar për rritjen e përfaqësimit politik të tyre.

Vëmendje e posaçme u është dedikuar dezinformatave dhe raportimit mediatik në lidhshmëri me aspektin gjinor. Është theksuar që sjellja sulmuese ndaj grave në politikë është gjithnjë e më shpesh e fokusuar ndaj dukjes, moralit dhe jetës personale të grave, nëvend që ndaj politikave dhe rezultateve të tyre. Në atë drejtim, është theksuar nevoja për monitorim të dezinformacioneve të bazuar në aspektin gjinor gjatë gjithë ciklit zgjedhor dhe për një përgjigje të koordinuar të institucioneve, mediave dhe shoqërisë qytetare.

Në panelin e dytë, të dedikuar për shoqërinë qytetare dhe mediat, është theksuar që vizibiliteti i grave nuk është e njëjta gjë sikur edhe përfaqësimi real. Megjithëse 42.9 % të kandidatëve në vitin 2024 kanë qenë femra, vetëm 2,4 % të teksteve të analizuara kanë qenë në lidhje me çështjet gjinore. Pjesëmarrësit e konferencës kanë bërë thirrje për standarde të barabarta gazetarie për të gjithë kandidatët dhe për raportim të vazhdueshëm për punën e grave të zgjedhura, edhe pas përfundimit të zgjedhjeve.

Si parakusht i rëndësishëm për pjesëmarrje thelbësore është cekur edhe edukimi politik, rrjetëzimi dhe përkrahje e grave jashtë strukturave politike, paralelisht me forcimin e demokracisë përbrenda partive.

Anëtari i Komisionit Shtetëror të Zgjedhjeve, Boris Kondarko, e përmbylli konferencën me mesazhin se Komisioni Shtetëror i Zgjedhjeve, përmes fushatave edukative dhe informative për rritjen e daljes në votime, mund të kontribuojë direkt në theksimin dhe vlerësimin më të madh të votës dhe të së drejtës zgjedhore aktive të grave në zgjedhje.

Konferenca i bashkoi përfaqësuesit e institucioneve, komunitetin ndërkombëtar, komunitetin e ekspertëve dhe qytetarëve dhe mediat, me qëllimi që nëpërmjet të dhënave zgjedhore të ndara në bazë gjinore, përvojave ndërkombëtare dhe perspektivave vendase të identifikohen mundësitë konkrete për rritjen e pjesëmarrjes dhe ndikimin e grave në proceset zgjedhore dhe në sjelljen e vendimeve.

KOMISIONI SHTETËROR I ZGJEDHJEVE

Dje në mesnatë skadoi afati për parashtrimin e listave për kandidatë për Kryetar të Komunës Bërvenicë. Për Zgjedhjet e parakohshme për Kryetar të Komunës Bërvenicë janë parashtruar gjithsej 6 lista kandidatësh, nga të cilat katër lista janë paraqitur nga një koalicion, kurse dy lista nga grup i zgjedhësve:

1. Koalicioni për Zgjedhje të parakohshme për Kryetar të Komunës Bërvenicë 2026, i udhëhequr nga LSDM – LIDHJA SOCIALDEMOKRATIKE E MAQEDONISË – LSDM, Partia e re Socialdemokratike – PRSD, Palë e veprimit demokratik të Maqedonisë dhe Partia për Prosperitet Demokratik të Romëve-PPDR, Desnica.

Jovica Radeski- kandidat

2. KOALICIONI VLEN

Jakup Useini- kandidat

3. KOALICIONI “MAQEDONIA YTE”

Stojanço Radiçeski- kandidat

4. ALEANCA KOMBËTARE PËR INTEGRIM – AKI

Arkin Jahiji – kandidat

5. GRUP I ZGJEDHËSVE – ARIFE IDRIZI

Arife Idrizi – kandidate

6. Grup i zgjedhësve DUSHAN BOGDANOVSKI

Dushan Bogdanovski – kandidat

Pas pranimit të listave, Komisioni Komunal Zgjedhor konstaton nëse janë përmbushur kushtet ligjore të Kodit Zgjedhor dhe nëse listat janë paraqitur në afatin e përcaktuar. Në rast se Komisioni Komunal Zgjedhor konstaton se lista është paraqitur në afatin e përcaktuar dhe është përpiluar në përputhje me dispozitat e Kodit Zgjedhor, listen e paraqitur do ta vërtetojë me aktvendim. Në rast se KKZ konstaton se lista përmban parregullsi, do të kërkojë nga parashtruesit e listave që t’i mënjanojnë parregullsitë në afat prej 48 orësh nga pranimi i njoftimit lidhur me parregullsitë të dërguar nga Komisioni. Pas mënjanimit të parregullsive të konstatuara, Komisioni Komunal Zgjedhor do ta vërtetojë listën me aktvendim.

Listat e parashtruara të kandidatëve mund të refuzohen për shkak të parashtrimit jo në kohë, në përputhje me Kalendarin e afateve për Zgjedhjet e parakohshme për Kryetar të Komunës Bërvenicë, ose në rast se KKZ-ja konstaton që parregullsitë ose lëshimet e konstatuara, paraqitësi i listës nuk i ka mënjanuar në afat prej 48 orësh në përputhje me Kalendarin e afateve. Listat e vërtetuara të kandidatëve për Kryetar të Komunës Bërvenicë, dorëzohen në KSHZ për përcaktimin e radhitjes në listën e kandidatëve si dhe për përcaktimin e listës së vetme të kandidatëve.

Tërheqjen e shortit për përcaktimin e listës së vetme të kandidatëve, KSHZ-ja do ta mbajë më së voni më 23 shtator 2026.

KOMISIONI SHTETËROR I ZGJEDHJEVE

Kryetari Mariçiq së bashku me anëtarët e Komisionit Shtetëror të Zgjedhjeve realizuan takim pune me ambasadorin e Mbretërisë së Suedisë në Maqedoninë e Veriut, Sh.T. Ola Sulstrom, në të cilin një nga temat kryesore të bisedës ishin aktivitetet dhe prioritetet aktuale të KSHZ-së, si dhe proceset zgjedhore të ardhshme në të dyja shtetet.

Komisioni e informoi ambasadorin se të gjitha përgatitjet operative dhe logjistike rrjedhin sipas Kalendarit të planifikuar të afateve për kryerjen e veprimeve zgjedhore për zbatimin e zgjedhjeve të parakohshme për kryetar të Komunës së Bërvenicës në vitin 2026. Në këtë drejtim, ambasadori Sulstrom informoi se edhe Ambasada e Mbretërisë së Suedisë është në fazë të përgatitjeve intensive organizative për zgjedhjet e tyre të ardhshme, pas së cilës bashkëbiseduesit shkëmbyen përvoja dhe mendime mbi sfidat me të cilat ballafaqohen të dyja palët.

Në takim, nga ana e ambasadorit Sulstrom u konfirmua se Mbretëria e Suedisë mbetet një partner dhe mbështetës i rëndësishëm i KSHZ-së në realizimin e reformave dhe modernizimit të procesit zgjedhor. Së bashku u theksua edhe angazhimi për forcimin e bashkimit operativ në periudhën e ardhshme me organizatën ndërkombëtare International IDEA, me theks të veçantë në digjitalizimin, forcimin e sigurisë kibernetike dhe avansimin e transparencës.

KOMISIONI SHTETËROR I ZGJEDHJEVE

        Komisioni Shtetëror i Zgjedhjeve i informon radiodifuzerët, mediat e shtypit dhe mediat elektronike (internet-portalet), që do të sigurojnë reklamim politik me pagesë për pjesëmarrësit në fushatën zgjedhore për Zgjedhjet e Parakohshme për kryetar të Komunës Bërvenicë, viti 2026, se janë të detyruar të regjistrohen në Komisionin Shtetëror të Zgjedhjeve, në afat prej 3 ditësh nga dita e shpalljes së zgjedhjeve.

           Radiodifuzerët, mediat e shtypit dhe mediat elektronike (internet-portalet) dorëzojnë “Kërkesë për regjistrim në regjistrin e radiodifuzerëve, mediave të shtypit dhe mediave elektronike (internet-portale) për Zgjedhjet e parakohshme për kryetar të Komunës Bërvenicë, viti 2026”, deri te Komisioni Shtetëror i Zgjedhjeve, detyrimisht me gjendjen rrjedhëse në shtojcë, të lëshuar nga Regjistri Qendror i Republikës së Maqedonisë së Veriut, jo më të vjetër se 3 ditë.

           Kërkesat për regjistrim me gjendjen rrjedhëse në shtojcë parashtrohen në formë elektronike në adresën elektronike si vijon: [email protected] ose në deri te arkivi i KSHZ-së në bul. “Shën Qirili dhe Metodij”, nr. 54, 1000 Shkup (më së voni deri më 10 gusht 2026, deri në orën 24:00).

           Bazuar në kërkesat për regjistrim, Komisioni Shtetëror i Zgjedhjeve do të përgatitë “Regjistër të radiodifuzerëve, mediave të shtypit dhe mediave elektronike (internet-portale) për Zgjedhjet e parakohshme për kryetar të Komunës Bërvenicë, viti 2026” që do të japin shërbime për reklamim politik me pagesë gjatë Zgjedhjeve të parakohshme për kryetar të Komunës Bërvenicë, 2026. Regjistri me kërkesat e parashtruara dhe të pranuara në mënyrë të rregullt për regjistrim në regjistrin e radiodifuzerëve, mediave të shtypit dhe mediave elektronike (internet-portale) për Zgjedhjet e parakohshme për kryetar të Komunës Bërvenicë, viti 2026, do të publikohet në faqen e internetit të Komisionit.

          Radiodifuzerët, mediat e shtypit dhe mediat elektronike (internet-portalet) janë të detyruar që në afat prej pesë ditësh nga dita e shpalljes së zgjedhjeve të përcaktojnë listat të çmimeve për reklamim politik me pagesë për pjesëmarrësit në procesin zgjedhor (më së voni deri më 12 gusht 2026, deri në orën 24:00).

                 Radiodifuzerët, mediat e shtypit dhe mediat elektronike (internet-portalet) janë të detyruar që listat e çmimeve për secilën media veçmas për reklamim politik me pagesë t’i aplikojnë edhe gjatë fushatës zgjedhore dhe gjatë kësaj, çmimin mesatar (mesin aritmetik) për një sekondë për 24 orë, të fituar sipas periudhave kohore të ndryshme çmim-reklamë, edhe atë:

Periudha 1 – nga ora 00:00 deri në orën 08:00, Periudha 2 – nga ora 08:00 deri në orën 16:00 dhe Periudha 3 – nga ora 16:00 deri në orën 24:00, tek radiodifuzerët për reklamim politik me pagesë, si dhe çmimin për qiramarrje të hapësirës reklamuese në median e shtypit nuk e tejkalon çmimin mesatar të reklamimit të secilit radiodifuzer veçmas të përllogaritur në pesë ciklet e fundit zgjedhore, që janë zhvilluar në territorin e tërë shtetit edhe atë për Zgjedhjet për anëtarë të këshillave komunalë dhe këshillit të Qytetit të Shkupit dhe për kryetarë të komunave dhe kryetar të Qytetit të Shkupit në vitin 2025, Zgjedhjet për President të Repuiblikës së Maqedonisë së Veriut në vitin 2024, Zgjedhjet për deputetë në Kuvendin e Republikës së Maqedonisë së Veriut në vitin 2024, Zgjedhjet për anëtarë të këshillave komunalë dhe këshillit të Qytetit të Shkupit dhe për kryetarë të komunave dhe kryetar të Qytetit të Shkupit në vitin 2021 dhe Zgjedhjet e parakohshme për deputetë në Kuvendin e Republikës së Maqedonisë së Veriut në vitin 2020, ndërsa për mediat elektronike (internet-portalet), çmimi për qiramarrje të hapësirës reklamuese në internet-portalin për reklamim politik me pagesë të mos e tejkalojë çmimin mesatar për reklmamim, të përllogaritur për pesë ciklet e fundit zgjedhore.

          Për radiodifuzerët, mediat e shtypit dhe mediat elektronike (internet-portalet) që nuk kanë marrë pjesë në të gjithë 5 ciklet e kaluara zgjedhore, çmimi për reklamim politik me pagesë nuk mund ta tejkalojë çmimin mesatar të reklamimit, i përllogaritur në pesë ciklet e kaluara zgjedhore në përputhje me Udhëzuesin për mënyrën dhe procedurën e vërtetimit të çmimit mesatar të dakorduar për reklamim politik me pagesë për çdo radiodifuzer, media shtypi dhe portal elektronik (internet-portal), që nuk ka marrë pjesë në pesë ciklet e fundit zgjedhore, i miratuar nga Komisioni Shtetëror i Zgjedhjeve me nr. 08-1926/1 të datës 07.08.2026.

             Komisioni Shtetëror i Zgjedhjeve e ka për detyrë që t’i vërtetojë dhe publikojë në ueb faqen e vet listat e çmimeve të dorëzuara me çmimet mesatarisht të përllogaritura, të përcaktuara nga radiodifuzerët dhe mediat e shtypit, si dhe t’i publikojë listat e çmimeve me çmimet e përcaktaura nga mediat elektronike (internet-portalet), në afat prej 10 ditësh nga skadimi i afatit për dorëzimin e listave të çmimeve, të përcaktuara në paragrafin (3) të këtij neni.

          Në rast se Komisioni Shtetëror i Zgjedhjeve konstaton parregullsi në listat e çmimeve të radiodifuzerëve dhe mediave të shtypit, e informon entitetin mediatik përkatës që të bëjë korrigjimin e listës së çmimeve në afat prej 72 orësh nga pranimi i informacionit.

        Arkivi i Komisionit Shtetëror të Zgjedhjeve do të merret me pranimin e kërkesave për regjistrim në regjistrin e radiodifuzerëve, mediave të shtypit dhe mediave elektronike (internet-portale) më datë 10.08.2026 (e hënë), deri në orën 24:00.

        Shënim: Në konsideratë do të merren vetëm kërkesat për regjistrim në Regjistër, të dorëzuara rreptësisht në postën e paraqitur më sipër: [email protected] ose në arkivin e Komisionit Shtetëror të Zgjedhjeve.

KOMISIONI SHTETËROR I ZGJEDHJEVE

Sot, Komisioni Shtetëror i Zgjedhjeve e fillon procesin e pranimit të kërkesave për vëzhgimin të Zgjedhjeve të parakohshme për kryetar të komunës Bërvenicë 2026, që do të mbahen më 18 tetor 2026.

Kërkesat për vëzhgim mund të dorëzohen:

– të gjitha shoqatat vendase dhe organizatat e huaja, të cilat janë të regjistruara në përputhje me ligjin, të paktën një vit para ditës së mbajtjes së zgjedhjeve, ndërsa në statutet e të cilave është i përfshirë parimi i mbrojtjes së të drejtave të njeriut.

– organizatat ndërkombëtare dhe

– përfaqësues të vendeve të huaja.

Parashtruesit e kërkesave për monitorimin e zgjedhjeve paraqesin Kërkesë për regjistrimin

e vëzhguesve të procesit zgjedhor, të cilën mund ta gjeni në ueb faqen www.sec.mk.

Shoqatat vendase dhe organizatat e huaja, përveç Kërkesës parashtrojnë edhe:

• kopje të Statutit të shoqatës,
• kopje nga regjistri pranë organit kompetent,
• listë të vëzhguesve dhe
• kopje të dokumentit për identifikim të vëzhguesve të propozuar.

Organizatat ndërkombëtare dhe përfaqësuesit e shteteve të huaja, përveç Kërkesës për vëzhgim, parashtrojnë edhe:

• listë të vëzhguesve dhe
• kopje dokumenti për identifikimin e vëzhguesve të propozuar.

Zgjedhjet mund t’i monitorojnë përfaqësues të mediave vendase dhe mediave të huaja.

Përfaqësuesit e mediave të huaja parashtrojnë edhe kërkesë për akreditim deri te Komisioni Shtetëror i Zgjedhjeve duke i parashtruar dokumentet e mëposhtme në shtojcë:

• formular për akreditim të mediave që mund të shkarkohet nga ueb-faqja www.sec.mk.
• listë të gazetarëve, kameramanë, fotoreporterë dhe
• kopje të dokumentit për identifikim personal.

Përfaqësuesit e mediave nga Republika e Maqedonisë së Veriut nuk i nënshtrohen procesit të akreditimit.

Kërkesat me shtojcat e nevojshme parashtrohen në mejll adresën [email protected], më së voni dhjetë ditë para ditës së votimi.

Komisioni Shtetëror i Zgjedhjeve do t’u lëshojë autorizim të gjithë parashtruesve për vëzhgim dhe monitorim të zgjedhjeve, të cilët i plotësojnë kushtet, më së voni 7 ditë pas parashtrimit të kërkesës.

KOMISIONI SHTETËROR I ZGJEDHJEVE

Udhëheqësia e Komisionit Shtetëror të Zgjedhjeve (KSHZ) realizoi një takim pune me drejtorin e Drejtorisë për Udhëheqjen e Librave Amë (DULA), z. Faton Fazliu, ku temat kryesore të bisedës ishin forcimi i bashkëpunimit dhe vendosja e një komunikimi operativ më të shpejtë dhe më efikas.

Kryetari i KSHZ-së, Bojan Mariçiq, theksoi se për ruajtjen e besimit të qytetarëve në tërë procesin zgjedhor, rëndësi vendimtare ka përditësimi me kohë dhe i vazhdueshëm i Listës Zgjedhore. Ai propozoi që, në kuadër të kompetencave ligjore të të dyja institucioneve, të shqyrtohen mundësitë për vendosjen e një mënyre digjitale për marrjen e të dhënave për ndryshimet në bazë të vdekjeve, me qëllim të regjistrimit me kohë të këtyre ndryshimeve nga terreni dhe eliminimit të ngecjeve administrative.

Drejtori i Drejtorisë për Udhëheqjen e Librave Amë, Faton Fazliu, e përshëndeti iniciativën e KSHZ-së për vendosjen e një komunikimi ndërinstitucional të drejtpërdrejtë më të afërt dhe më të shpeshtë, veçanërisht ndërmjet njësive rajonale dhe zyrave të të dyja institucioneve. Ai theksoi se Drejtoria, me gjithë sfidat reale operative dhe mungesën e burimeve njerëzore, mbetet plotësisht e përkushtuar në përmbushjen e obligimeve ligjore dhe në gjetjen e mënyrave më efikase për përcjelljen e të dhënave, me qëllim të përditësimit me kohë dhe të saktë të Listës Zgjedhore. Në drejtim të një zgjidhjeje afatgjatë dhe sistemore, Fazliu theksoi mundësinë që ofron Platforma kombëtare e interoperabilitetit, në mënyrë që KSHZ-ja të ketë qasje në të dhënat dhe një shkëmbim të vazhdueshëm e të automatizuar të informacioneve.

Duke iu referuar gjetjeve pozitive në Raportin për Zgjedhjet Lokale 2025 të OSBE/ODIHR-it, nënkryetari i KSHZ-së, Abdush Demiri, theksoi se Komisioni në vazhdimësi e avancon transparencën dhe e forcon integritetin e KSHZ-së, duke vënë në dukje se aktivitetet e këtilla ndërinstitucionale dhe bashkëpunimi i ngushtë me DULA-n kontribuojnë drejtpërdrejt në një saktësi edhe më të madhe të Listës Zgjedhore, gjë që rrit më tej besimin e publikut në tërë procesin zgjedhor.

Në takim, anëtarët e Komisionit theksuan nevojën për respektimin e përpiktë të dinamikës së përcaktuar me ligj për dorëzimin e të dhënave, duke potencuar se shkëmbimi i shpejtë i informacioneve mund të parandalojë mospërputhjet në Listën Zgjedhore. Ata vunë në dukje se, pavarësisht mekanizmave ekzistues mbrojtës të sigurisë dhe zbatimit të identifikimit biometrik me gjurmë të gishtrinjve, i cili në praktikë e pamundëson plotësisht çfarëdo keqpërdorimi gjatë votimit, çdo vonesë në përditësimin e të dhënave lë hapësirë për dyshime të pabaza në opinion, gjë që ndikon drejtpërdrejt në perceptimin për integritetin e procesit zgjedhor.

Bashkëbiseduesit u dakorduan që në periudhën e ardhshme të nënshkruajnë një Memorandum bashkëpunimi, me të cilin do të rregullohen saktësisht obligimet e ndërsjella dhe protokollet e veprimit, ndërsa një grup i përbashkët pune i përbërë nga përfaqësues të të dyja institucioneve do t’i përcaktojë hapat teknikë dhe operativë për realizimin e aktiviteteve të dakorduara.

KOMISIONI SHTETËROR I ZGJEDHJEVE

Komisioni Shtetëror i Zgjedhjeve (KSHZ), më 8 korrik 2026, mbajti seancën e 9-të në përbërje të plotë, në të cilën me konsensus u miratuan disa akte me qëllim të saktësimit të procedurave për regjistrimin e pasurisë, harmonizimin dhe zëvendësimin e vulave zyrtare të organeve zgjedhore, si dhe zbatimin e edukimit të vazhdueshëm të publikut gjatë periudhës jashtëzgjedhore.

Në fillim të seancës, anëtarët e KSHZ-së miratuan njëzëri Rregulloren e re dhe Procedurën për mënyrën e kryerjes së regjistrimit dhe harmonizimit të gjendjes kontabël të mjeteve dhe detyrimeve me gjendjen faktike. Këto akte miratohen në përputhje me detyrimet ligjore për kontabilitetin e shfrytëzuesve buxhetorë dhe kanë për qëllim të sigurojnë saktësi maksimale, transparencë dhe pasqyrim real të pronës institucionale dhe të librave kontabël.

Për shkak të ndërlidhjes së akteve të propozuara dhe në drejtim të një vendimmarrjeje më efikase, në përputhje me nenin 42, paragrafët 2 dhe 3 të Rregullores së Punës së KSHZ-së, Komisioni zhvilloi shqyrtim dhe votim të vetëm për paketën e vendimeve që kanë të bëjnë me vulat zgjedhore dhe vulat katrore. Me këtë rast, u votuan njëzëri vendimet për ndryshimin, plotësimin dhe zëvendësimin e vulave dhe vulave katrore që përdoren nga Komisioni Shtetëror i Zgjedhjeve dhe njësitë e tij rajonale, komisionet komunale të zgjedhjeve, si dhe për vendvotimet që janë nën kompetencën e KKZ-ve Gazi Babë, Vasilevë, Zelenikovë, Karbinc, Konçe, Petrovec dhe Çuçer Sandevë.

Në seancë u miratua njëzëri Programi vjetor për edukimin e aktorëve të ndryshëm në zgjedhje gjatë periudhës jashtë procesit zgjedhor për vitin 2026. Miratimi i këtij programi është detyrim ligjor i KSHZ-së, në pajtim me nenin 31, paragrafi 2, pika 6-a të Kodit Zgjedhor, për sigurimin e trajnimeve të vazhdueshme për të gjithë pjesëmarrësit në procesin zgjedhor. Qëllimi kryesor është vendosja e një sistemi të qëndrueshëm të edukimit ndërmjet dy cikleve zgjedhore, i cili do të kontribuojë në thellimin e njohurive, kuptimin më të mirë të rregullativës dhe përgatitjen praktike për të gjitha palët e përfshira. Me realizimin e këtyre trajnimeve të vazhdueshme gjatë periudhës jashtëzgjedhore, KSHZ-ja synon forcimin afatgjatë të integritetit, rezistencën ndaj parregullsive, si dhe rritjen e transparencës dhe besimit të publikut në procesin zgjedhor.

Seanca e 9-të e KSHZ-së

KOMISIONI SHTETËROR I ZGJEDHJEVE

Nënkryetari i Komisionit Shtetëror të Zgjedhjeve, Abdush Demiri, së bashku me anëtarët Angellço Ristov, Aleksandar Dashtevski, si dhe sekretaren e përgjithshme të KSHZ-së, Ivana Kostadinoska, mori pjesë dhe iu drejtua pjesëmarrësve në Takimin e 13-të vjetor të organeve për menaxhimin e zgjedhjeve (EMBs), i cili më 17 dhe 18 qershor 2026 po mbahet në Batumi të Gjeorgjisë, në organizim të Komisionit Qendror të Zgjedhjeve të Gjeorgjisë.

Në sesionin e tretë tematik kushtuar “Inteligjencës artificiale dhe rrjeteve sociale në proceset zgjedhore: mundësitë dhe rreziqet”, Demiri mbajti fjalim në temën “Roli i organeve për menaxhimin e zgjedhjeve në mbrojtjen e integritetit zgjedhor në epokën e inteligjencës artificiale dhe rrjeteve sociale”.

Në fjalimin e tij, ai theksoi se transformimi digjital sjell mundësi të reja për administratat zgjedhore, por njëkohësisht hap edhe sfida serioze për ruajtjen dhe vazhdimësinë e besimit në proceset zgjedhore. Sipas tij, në kushte kur inteligjenca artificiale mundëson krijimin e gënjeshtrave dhe përmbajtjeve manipuluese gjithnjë e më bindëse, mbrojtja e integritetit zgjedhor nuk ka të bëjë më vetëm me procedurat zgjedhore, por edhe me ambientin informativ në të cilin qytetarët i formësojnë qëndrimet dhe vendimet e tyre.

Demiri nënvizoi se institucionet zgjedhore duhet t’u përshtaten ndryshimeve të shpejta teknologjike dhe të zhvillojnë kapacitete të reja për të identifikuar dhe përballuar rreziqet digjitale, duke mbetur njëkohësisht besnike me parimet e transparencës, paanshmërisë dhe mbrojtjes së vlerave demokratike.

Duke iu referuar përvojave të Komisionit Shtetëror të Zgjedhjeve, ai theksoi se Komisioni në vazhdimësi ndjek trendet bashkëkohore teknologjike dhe mundësitë për zbatimin e tyre. Njëkohësisht, ai prezantoi zgjidhjet digjitale që KSHZ-ja tashmë po i zbaton për forcimin e integritetit të procesit zgjedhor, mes të cilave identifikimin biometrik të votuesve dhe sistemin softuerik për përzgjedhjen e rastësishme të anëtarëve të këshillave zgjedhore.

Në fjalim u theksua edhe nevoja për një kornizë të përshtatçme ligjore për t’u përballur me sfidat që sjellin platformat digjitale dhe rrjetet sociale në procesin zgjedhor. Demiri vuri në dukje se aktivitetet aktuale për reforma në Kodin Zgjedhor paraqesin një mundësi për vendosjen e kompetencave më të qarta institucionale dhe mekanizmave më efikasë për mbrojtjen e integritetit zgjedhor në hapësirën digjitale.

Ai potencoi se përballja e suksesshme me kërcënimet e organizuara digjitale kërkon një qasje të koordinuar dhe bashkëpunim të ngushtë ndërmjet institucioneve zgjedhore, rregullatorëve të mediave, kompanive teknologjike, shoqërisë civile dhe partnerëve ndërkombëtarë.

Në fund të fjalës së tij, Demiri porosit se zhvillimi teknologjik është i pashmangshëm, por se ruajtja e besimit në proceset demokratike varet nga aftësia e institucioneve për t’u përshtatur me kohë dhe për të siguruar kushte për zgjedhje kredibile, transparente dhe gjithëpërfshirëse. Takimi vjetor i organeve për menaxhimin e zgjedhjeve përfaqëson një nga platformat më të rëndësishme ndërkombëtare për shkëmbimin e përvojave dhe praktikave të mira mes administratave zgjedhore. Forumi i këtij viti i kushtohet ndikimit të desinformimit, inteligjencës artificiale dhe rrjeteve sociale mbi proceset zgjedhore dhe institucionet demokratike, ndërsa pjesëmarrësit diskutojnë për mekanizmat e mundshëm për forcimin e qëndrueshmërisë së sistemeve zgjedhore dhe besimit të publikut në rezultatet e zgjedhjeve.

KOMISIONI SHTETËROR I ZGJEDHJEVE

Me trajnimin me temë „Identifikimi, vlerësimi dhe menaxhimi i rreziqeve nga korrupsioni“, të dedikuar për anëtarët dhe t; punësuarit e Komisionit Shtetëror të Zgjedhjeve, dhe të organizuar në bashkëpunim e me mbështetjen e Misionit të OSBE-së në Shkup, zyrtarisht filloi faza e parë praktike e hartimit të Regjistrit të rreziqeve nga korrupsioni të KSHZ-së.

Në fjalimin e tij hyrës, kryetari i KSHZ-së, Bojan Mariçiq, theksoi se përballja me këtë sfidë komplekse shoqërore është një çështje jashtëzakonisht aktuale, veçanërisht mbrojtja e administratës zgjedhore nga ndikimet korruptive. Ai potencoi se mbrojtja më e mirë e KSHZ-së nuk është reagimi pasi lëshimi të ketë ndodhur, por krijimi i një sistemi të qëndrueshëm të brendshëm përmes parandalimit të saktë.  Duke iu referuar praktikës ndërkombëtare, Mariçiq tha se „qëndrueshmëria e trupave zgjedhorë nuk matet vetëm me gatishmërinë e tyre teknike për zbatimin e zgjedhjeve, por me aftësinë e tyre për të parashikuar dhe neutralizuar paraprakisht rreziqet e brendshme dhe të jashtme ndaj integritetit të tyre“

Ai shprehu falënderim të veçantë për Misionin e OSBE-së në Shkup dhe ambasadorin, SH.T. Kilian Vall për mbështetjen afatgjatë, si dhe për kryetarin e KSHPK-së (Komisionit Shtetëror për Parandalimin e Korrupsionit), z. Adem Çuçul, duke theksuar se kohezioni ndërinstitucional konfirmon përkushtimin e përbashkët për tolerancë zero ndaj rreziqeve korruptive.

Në këtë ngjarje, shefi i Misionit të OSBE-së në Shkup, ambasadori Vall, theksoi se mbështetja e zgjedhjeve të lira, demokratike dhe gjithëpërfshirëse është një nga angazhimet themelore të OSBE-së, ndërsa bashkëpunimi i deritanishëm me KSHZ-në dhe KSHPK-në tashmë ka sjellë rezultate konkrete në avancimin e integritetit zgjedhor. Ai theksoi se hartimi i Regjistrit të rreziqeve nga korrupsioni përfaqëson një mjet praktik dhe të qëndrueshëm që duhet të dëshmohet në praktikë.

“Hartimi i Regjistrit të rreziqeve nga korrupsioni nuk është thjesht një ushtrim teknik, por edhe një investim i rëndësishëm në qëndrueshmërinë institucionale, transparencën dhe besimin e publikut.”, tha ambasadori Vall.

Hartimi i këtij dokumenti strategjik, i cili synon të ndërtojë një qëndrueshmëri afatgjatë dhe një sistem imunitar të brendshëm të institucionit përmes parandalimit të saktë dhe mapimit të çdo pike të ndjeshme në procedurat operative, po zhvillohet nën mentorimin e ekspertes, znj. Aneta Arnaudovska, përvoja profesionale e së cilës është një garanci e plotë se specifikat e punës së KSHZ-së do të pasqyrohen në një dokument me standardet më të larta ndërkombëtare.

Ky aktivitet, ku mysafirë ishin edhe përfaqësuesit nga Komisioni Shtetëror për Parandalimin e Korrupsionit, pason mbështetjen afatgjatë nga ana e Misionit të OSBE-së dhe është pjesë e Politikës së Integritetit, ku progresi i KSHZ-së është real dhe i matshëm.

Treguesit zyrtarë konfirmojnë një rritje serioze në harmonizimin e Komisionit me politikat antikorrupsion, e cila nga 61% në vitin 2023 është rritur në 73% në vitin 2025.

Trajnimi, i cili u moderua nga Natalia Rusu, shefe e Departamentit të Demokratizimit pranë Misionit të OSBE-së në Shkup, në pjesën e saj të punës përfshiu edhe simulime praktike për identifikimin e proceseve dhe nënproceseve, si dhe diskutim mbi avantazhet e vendosjes së standardit ndërkombëtar ISO 37001. Me këtë hap, KSHZ-ja dërgon një mesazh të qartë se parandalimi dhe llogaridhënia janë një angazhim praktik i përditshëm i institucionit.

KOMISIONI SHTETËROR I ZGJEDHJEVE