Kryetari i Komisionit Shtetëror të Zgjedhjeve (KSHZ), Bojan Mariçiq, dhe nënkryetari Abdush Demiri zhvilluan një takim pune me zëvendëskryeministrin e parë dhe ministrin për çështje evropiane, Bekim Sali, në të cilin u theksua përgjegjësia e përbashkët institucionale për avancimin e ambientit demokratik dhe për miratimin në kohë të ndryshimeve në Kodin Zgjedhor.

Udhëheqësia e KSHZ-së e informoi zëvendëskryeministrin e parë për aktivitetet aktuale dhe përparimin e arritur, të shënuar në Raportin e OSBE/ODIHR-it për Zgjedhjet Lokale 2025. Në kuadër të bisedës, KSHZ-ja theksoi nevojën për mbështetje ndaj propozim-ndryshimeve të Kodit Zgjedhor para zëvendëskryeministrit Sali, si një hap esencial për plotësimin e boshllëqeve ligjore dhe për harmonizim të plotë me rekomandimet ndërkombëtare të OSBE/ODIHR-it. Bashkëbiseduesit u pajtuan se këto reforma, të cilat përfshijnë plotësisht  rekomandimet e OSBE/ODIHR-it, janë kontribut i drejtpërdrejtë drejt përmbushjes e Agjendës Reformuese evropiane dhe janë në interes të qytetarëve dhe shtetit.

Zëvendëskryeministri i parë dhe ministri për çështje evropiane, Bekim Sali, në takim theksoi se Qeveria e ndjek me vigjilencë procesin e ndryshimeve të Kodit Zgjedhor dhe mbetet fuqimisht e përkushtuar për realizimin e reformave sipas dinamikës së paraparë, me qëllim forcimin e mëtejshëm të standardeve demokratike dhe sigurimin e kushteve për procese zgjedhore legjitime. Ai shtoi se mbështetja për propozimet e KSHZ-së për ndryshimin e Kodit Zgjedhor duhet të vijë nga të gjitha palët e interesuara dhe është kyçe në këtë proces, veçanërisht kur bëhet fjalë për ndryshime që fokusohen në integritetin operativ dhe efikasitetin administrativ gjatë zbatimit të zgjedhjeve.

Në takim, nënkryetari i KSHZ-së, Abdush Demiri, adresoi edhe sfidat aktuale të Komisionit, për të cilat pritet mbështetje në kohë dhe adekuate nga ana e Qeverisë, ndër të cilat edhe pagesa e kompensimeve për organet zgjedhore në komunat me xhirollogari të bllokuara.

Në fund të takimit, bashkëbiseduesit konfirmuan fokusin dhe përkushtimin e përbashkët për finalizimin e ndryshimeve ligjore deri në qershor  2026 dhe përmbushjen e obligimeve nga Agjenda e Reformave, të cilat sjellin deri në 4,2 milionë euro mjete nga BE-ja, të dedikuara për harmonizim të plotë me standardet evropiane.

KOMISIONI SHTETËROR I ZGJEDHJEVE

Kryetari i Komisionit Shtetëror të Zgjedhjeve, Bojan Mariçiq, së bashku me anëtarët e Komisionit, zhvilluan një takim pune me ambasadorin e Misionit të OSBE-së në Shkup, Sh.T. Kilian Vall. Takimi u zhvillua në frymën e konfirmimit të rezultateve të deritanishme, por edhe të përcaktimit të fushave ku do të forcohet bashkëpunimi, në prag të ndryshimeve të ardhshme ligjore.

Në takim, ambasadori Val shprehu vlerësim të lartë për Komisionin, duke theksuar se Komisioni Shtetëror i Zgjedhjeve është një institucion me besueshmëri të madhe dhe përfaqëson një histori suksesi në shtet. Ky vlerësim i lartë përputhet me konkluzionin e përbashkët se Raporti përfundimtar i OSBE/ODIHR-it është një pasqyrim objektiv dhe real i procesit zgjedhor të zbatuar me sukses, me çka përforcohet edhe më tej kredibiliteti i institucionit.

Në këtë kontekst, udhëheqësia e Komisionit theksoi se janë të vetëdijshëm për sfidat e evidentuara në Raportin e ODIHR-it për Zgjedhjet Lokale 2025, me ç’rast u nënvizua përkushtimi e fortë dhe angazhimi i veçantë në të cilin do të punohet në periudhën e ardhshme për implementimin e plotë të rekomandimeve të dhëna. Anëtarët e Komisionit e njoftuan ambasadorin për propozimet tashmë të dorëzuara në grupin e punës për ndryshime në Kodin Zgjedhor, duke theksuar se presin që këto propozime të pranohen në tërësi, me qëllim që të sigurohet efikasiteti operativ dhe shkalla më e lartë e sigurisë juridike të proceseve zgjedhore, duke respektuar ekskluzivisht standardet profesionale dhe ndërkombëtare.

Ambasadori Val konfirmoi se Misioni i OSBE-së do ta intensifikojë më tej mbështetjen për Komisionin Shtetëror të Zgjedhjeve, ndërsa bashkëbiseduesit u pajtuan se ky bashkëpunim i përforcuar do të jetë i orientuar drejt realizimit të qëllimeve strategjike kyçe për transparencë dhe gjithëpërfshirje më të madhe të sistemit zgjedhor.

Në këtë drejtim, aktivitetet e përbashkëta në periudhën e ardhshme do të fokusohen në finalizimin e Regjistrit të rreziqeve nga korrupsioni, si pjesë përbërëse e Politikës për integritet të institucionit, si dhe në aktivitete që kanë të bëjnë me edukimin në terren, me grupe të ndryshme të synuara.

Në fund të takimit, u shpreh falënderim për ambasadorin Val për përkushtimin e tij personal gjatë mandatit, me ç’rast u konkludua se mbështetja nga OSBE mbetet një shtyllë vitale për zhvillimin e mëtejshëm demokratik dhe harmonizimin e plotë të proceseve zgjedhore me standardet ndërkombëtare.

KOMISIONI SHTETËROR I ZGJEDHJEVE

Komisioni Shtetëror i Zgjedhjeve, më datë 16.04.2026, në përbërje të plotë mbajti seancën e 3-të, në të cilën në mënyrë unanime u miratuan disa akte kyçe të orientuara drejt avancimit të standardeve të brendshme të punës dhe forcimit të kapaciteteve institucionale.

Në kuadër të rendit të ditës u miratuan procedurat për punë jashtë orarit dhe pagesën e shtesave në pagë, si dhe procedura për mungesë nga hapësirat e punës, me çka institucioni formalizon praktikat pozitive të deritanishme dhe vendos mekanizma të saktë për evidencë dhe vlerësim të punës në përputhje me standardet bashkëkohore.

Si pikë e rendit të ditës u miratua edhe Plani Aksional për avancimin e perspektivës gjinore (PAGJ) 2026–2028, dokument strategjik për integrimin e parimeve të inkluzivitetit dhe për avancimin e kulturës institucionale, standardeve profesionale dhe inkluzivitetit të procesit zgjedhor në Republikën e Maqedonisë së Veriut.

Në drejtim të forcimit të gatishmërisë administrative, Komisioni miratoi edhe Programin për trajnimin e udhëheqësisë dhe të punësuarve në Komisionin Shtetëror të Zgjedhjeve, me Plan për trajnime nga fusha e mbrojtjes së të dhënave personale për vitin 2026. Ky akt buron nga detyrimet ligjore për harmonizim të plotë me legjislacionin vendor dhe Rregulloren Evropiane (GDPR).

Nën pikën “Të ndryshme”, kryetari i KSHZ-së, Bojan Mariçiq, e hapi çështjen e vonesave dhe pagesave jo të plota të kompensimeve për anëtarët e organeve zgjedhore për Zgjedhjet Lokale të vitit 2025 nga ana e një pjese të komunave. Në paraqitjen e tij, ai theksoi se, në përputhje me Kodin Zgjedhor, përgjegjësia për pagesën e këtyre mjeteve është detyrim ekskluziv i komunave dhe i Qytetit të Shkupit. Njëkohësisht, ai vuri në dukje se KSHZ-ja është organi i vetëm kompetent për miratimin e Rregullores për kompensime, prandaj çdo vendim i pavarur i autoriteteve lokale për revidimin e saj ose uljen e shumave është i pabazuar ligjërisht dhe i pavlefshëm.

Me qëllim tejkalimin e situatës në komunat me llogari të bllokuara, Komisioni tashmë ka ndërmarrë hapa konkretë dhe iu është drejtuar Ministrisë së Financave dhe Qeverisë për gjetjen e një mekanizmi të përshtatshëm për sigurimin e mjeteve të nevojshme. Mariçiq theksoi se Komisioni Shtetëror i Zgjedhjeve mbetet i angazhuar për tejkalimin e problemit dhe paralajmëroi koordinim shtesë me udhëheqësinë e BNJVL-së dhe kryetarët e një pjese të komunave, me qëllim të gjetjes së një zgjidhjeje të përbashkët për pagesën urgjente të kompensimeve dhe mbrojtjen e plotë të të drejtave ligjore dhe dinjitetit të të gjithë qytetarëve të përfshirë në procesin zgjedhor.

KOMISIONI SHTETËROR I ZGJEDHJEVE

Kryetari i Komisionit Shtetëror të Zgjedhjeve (KSHZ), Bojan Mariçiq, së bashku me anëtarët e Komisionit, Aleksandar Dashtevski dhe Boris Kondarko, morën pjesë në tryezën e rrumbullakët me temë: “Gatishmëria e institucioneve për t’iu përgjigjur ndërhyrjeve të huaja dhe manipulimit me informacione (SMMI): sfidat, koordinimi dhe hapat e ardhshëm”, e organizuar nga Instituti për Studime të Komunikimit (ISK).

Prania dhe përfshirja e udhëheqjes së KSHZ-së në këtë aktivitet e konfirmon përcaktimin strategjik të Komisionit për mbrojtjen   e besueshmërinë e proceseve zgjedhore nga ndikimet e jashtme dhe fushatat e dezinformimit. Në këtë aktivitet, ekspertë të lartë vendas dhe ndërkombëtarë, ndër të cilët edhe përfaqësues nga OSBE/ODIHR dhe Shërbimi i Komunikimeve i Qeverisë së Mbretërisë së Bashkuar, diskutuan për nevojën e mobilizimit shumë më herët para mbajtjes së vetë zgjedhjeve, duke theksuar domosdoshmërinë e përfshirjes së hershme të të gjitha institucioneve përkatëse. Ekspertja nga OSBE/ODIHR, Françeska Bogeri, theksoi se është e domosdoshme që institucionet të fillojnë monitorimin e këtyre dukurive shumë më herët, me qëllim që të mundësohet komunikim dhe koordinim në kohë.

Për Komisionin Shtetëror të Zgjedhjeve, ndërtimi i rezistencës ndaj ndikimeve të këtilla paraqet një element kyç në konsolidimin e kapaciteteve institucionale. Pjesëmarrja në diskutim mundësoi shkëmbimin e përvojave mbi modelin britanik „RESIST“ (RESIST), si dhe mbi modelet e koordinimit që mund të zbatohen në kontekstin kombëtar me qëllim mbrojtjen e vullnetit të lirë të qytetarëve dhe diskursit demokratik.

Ngjarja u organizua në kuadër të projektit “Forcimi i gatishmërisë operacionale të Qeverisë për t’iu përgjigjur SMIM në Maqedoninë e Veriut”, i mbështetur nga Ambasada Britanike në Shkup.

KOMISIONI SHTETËROR I ZGJEDHJEVE

Komisioni Shtetëror i Zgjedhjeve (KSHZ) shpreh shqetësim serioz në lidhje me vonesën dhe pagesën jo të plotë të kompensimeve për anëtarët e organeve zgjedhore për Zgjedhjet Lokale të vitit 2025 nga ana e disa komunave të Shkupit dhe u bën apel kryetarëve të komunave dhe Bashkësisë së Njësive të Vetëqeverisjes Lokale (BNJVL) për respektim konsekuent të dispozitave ligjore gjatë realizimit të këtyre pagesave.

Edhe pse mijëra qytetarë i kanë kryer detyrat e tyre në mënyrë profesionale, me përgjegjësi dhe në përputhje me standardet më të larta, është e papranueshme që ata ende të përballen me detyrime të parregulluara ose me përpjekje për të ulur në mënyrë të paligjshme shumat e parapra. Në këtë drejtim, KSHZ-ja deklaron qartë se çdo vendim me të cilin në mënyrë të pavarur revidohet lartësia e kompensimeve është juridikisht i pabazuar dhe i pavlefshëm.

Organi i vetëm kompetent për miratim të Rregullores për kompensime është Komisioni Shtetëror i Zgjedhjeve, në përputhje me nenin 31 të Kodit Zgjedhor. Ky akt është i detyrueshëm për të gjitha subjektet dhe zbatimi i tij selektiv përbën shkelje të drejtpërdrejtë të ligjit dhe rrënon dinjitetin e administratës zgjedhore.

Edhe pse pjesa më e madhe e komunave në vend i kanë përmbushur tashmë detyrimet e tyre ligjore, është shqetësuese fakti që një pjesë nga komunat e Shkupit ende po e vonojnë këtë procedurë, pavarësisht udhëzimeve në kohë për planifikimin e këtyre fondeve në buxhetet komunale që nga korriku i vitit të kaluar. Për më tepër, ju kujtojmë se në përputhje me nenin 88, paragrafi 4 i Kodit Zgjedhor, fondet për mbajtjen e zgjedhjeve lokale sigurohen nga buxhetet e komunave.

Me qëllim mbrojtjen e të drejtave të administratës zgjedhore, që është thelbësore për integritetin e çdo procesi zgjedhor, si dhe për të parandaluar shpenzimet shtesë në barrë të buxheteve komunale për shkak të padive tashmë të paralajmëruara nga anëtarët e organeve zgjedhore, KSHZ-ja inicon një takim urgjent koordinues me drejtuesit e BNJVL-së  dhe kryetarët e komunave të prekura, i cili pritet të mbahet gjatë kësaj jave me qëllim tejkalimin e problemeve dhe gjetjen e një zgjidhjeje të shpejtë për këtë çështje.

KOMISIONI SHTETËROR I ZGJEDHJEVE

Komisioni Shtetëror i Zgjedhjeve mbajti seancën e dytë, në të cilën u shqyrtuan dhe u miratuan unanimisht disa akte të rëndësishme për funksionimin operativ dhe financiar të institucionit, me fokus të veçantë në llogaridhënien dhe transparencën në shpenzimin e fondeve buxhetore.

Komisioni e miratoi unanimisht Raportin Përfundimtar për zgjedhjet e përsëritura për kryetarë të komunave në komunat Gostivar, Vrapçisht, Mavrovë dhe Rostushë dhe Qendër Zhupë nga janari i vitit 2026, së bashku me pasqyrën financiare, e cila është detyrim ligjor i Komisionit Shtetëror të Zgjedhjeve ta dorëzojë në Kuvendin e Republikës së Maqedonisë së Veriut dhe ta publikojë në faqen e tij të internetit.

Si pikë e rendit të ditës u miratua edhe Raporti Vjetor mbi Llogaritë përfundimtare të Komisionit Shtetëror të Zgjedhjeve për vitin 2025, përmes të cilit Komisioni jep një pasqyrë të detajuar të operacioneve financiare për vitin e kaluar zgjedhor. Sipas Raportit, nga buxheti total për vitin 2025 në shumën prej 623.659.000 denarë, janë realizuar 559.531.966 denarë, respektivisht 89,72% e fondeve të alokuara. Analiza e shpenzimeve tregon se 75% e buxhetit të përgjithshëm ishte për reklamë politike të paguar për zgjedhjet lokale (64,14%) dhe kompensime për administratën zgjedhore (10,66%). Komisioni Shtetëror i Zgjedhjeve ka menaxhuar me përgjegjësi dhe kujdes fondet shtetërore, duke arritur kursime të konsiderueshme. Fondet e papërdorura në shumën prej 981.752 euro janë kthyer në buxhetin e Republikës së Maqedonisë së Veriut.

Në seancë u u miratua edhe Vendimi për formimin e grupit punues profesional nga ekspertë të jashtëm të TIK-ut, fokusi i të cilëve do të jetë analiza teknike, mirëmbajtja dhe mbrojtja e Sistemit të integruar për identifikim biometrik. Me këtë Vendim parashihet formimi i tre grupeve të specializuara të ekspertëve të cilët do t’i mbulojnë aspektet kyçe të procesit: analiza e përvojave të deritanishme, hulumtimi i praktikave ndërkombëtare dhe përgatitja e parakushteve të nevojshme softuerike dhe harduerike për funksionalitet afatgjatë dhe siguri të sistemit.

Përveç kësaj, u miratua Rregullorja mbi kriteret për përcaktimin e kompensimit për anëtarët e organeve zgjedhore dhe administratën zgjedhore që kanë realizuar votimin në institucionet ndëshkuese-përmirësuese ose në institucionet e përkujdesjes jashtëfamiljare, si dhe Rregullorja mbi kushtet dhe mënyrën e shfrytëzimit të kartelës zyrtare pagesore dhe mjeteve për reprezentim. Me këto akte rregullohen më tej procedurat e brendshme, me qëllim të sigurimit të profesionalizmit maksimal dhe ekonomizimit në punë.

Komisioni Shtetëror i Zgjedhjeve mbetet i përkushtuar ndaj parimeve të ligjshmërisë dhe llogaridhënies, duke vazhduar menaxhimin transparent të resurseve edhe gjatë vitit 2026.

KOMISIONI SHTETËROR I ZGJEDHJEVE

Kryetari i Komisionit Shtetëror të Zgjedhjeve (KSHZ), Bojan Mariçiq, së bashku me anëtarët e Komisionit, morën pjesë në konferencën përmbyllëse „Mbrojtja e demokracisë dhe integritetit zgjedhor: Monitorimi i keqpërdorimit me burimet administrative, reklamimin politik dhe fushatat e palëve të treta”, të organizuar nga Fondacioni Ndërkombëtar për Sisteme Zgjedhore (IFES).

Në konferencë, e cila është pjesë e projektit BRIDGE i financuar nga Qeveria e Mbretërisë së Bashkuar dhe Agjencia Zvicerane për Bashkëpunim, në fokus të paneleve ishin rreziqet kryesore nga keqpërdorimi me burimet administrative dhe ndikimi i reklamimit politik mbi integritetin e proceseve zgjedhore.

Në kuadër të diskutimeve, përfaqësuesit e KSHZ-së theksuan përkushtimin e institucionit në periudhën e ardhshme për forcimin e mekanizmave të transparencës dhe llogaridhënies. Theks i veçantë u vu mbi përvojat nga Zgjedhjet Lokale të vitit 2025 dhe nevojën për digjitalizim të vazhdueshëm të proceseve, me qëllim mbrojtjen e integritetit zgjedhor dhe parandalimin e çfarëdo forme të keqpërdorimit të burimeve. Pjesëmarrja e KSHZ-së në këtë ngjarje është edhe një konfirmim i partneritetit shumëvjeçar dhe të palëkundur midis KSHZ-së dhe IFES-it. Si institucion, ne e vlerësojmë lart mbështetjen e tyre strategjike në proceset kyçe reformuese, veçanërisht në fushën e digjitalizimit dhe ndërtimit të kapaciteteve të administratës zgjedhore, që është e një rëndësie thelbësore për ruajtjen e besimit në proceset demokratike.

KOMISIONI SHTETËROR I ZGJEDHJEVE

Përbërja e re e sapoemëruar e Komisionit Shtetëror të Zgjedhjeve (KSHZ) sot, më 11.02.2026, mbajti seancën e 1-rë, në të cilën u shqyrtuan dhe miratuan disa vendime dhe konkluzione nga Rendit i Ditës, të cilat kanë të bëjnë me veprimtarinë e rregullt dhe përgatitjen teknike të institucionit.

Me qëllim të realizimit të pandërprerë të aktiviteteve specifike që kërkojnë njohuri të veçanta teknike, KSHZ-ja miratoi vendim për angazhimin e ekspertëve të jashtëm në grupin punues për infrastrukturën e TIK-ut dhe përpunimin e Listës zgjedhore. Kryetari Mariçiq sqaroi se ky angazhim është i dedikuar dhe i bazuar në projekt, me qëllim ruajtjen e standardeve më të larta të sigurisë së bazave të të dhënave, me angazhim të personave deri në korrik të vitit 2026. Përveç kësaj, u miratau edhe vendim për përcaktimin dhe pagesën e kompensimit për dy persona, të angazhuar si trupa ndihmëse në njësitë rajonale dhe në KSHZ për Zgjedhjet Lokale 2025, të cilët për shkak të një lëshimi teknik në Vendimin e mëparshëm për përcaktimin dhe pagesën e kompensimit për personat e angazhuar për Zgjedhjet Lokale 2025, kishin mbetur të papërfshirë.

Anëtarët e Komisionit e miratuan njëzëri Njoftimin lidhur me Draft-raportin e Entit Shtetëror për Revizion për vitin 2024. Po ashtu, në kuadër të detyrimeve ligjore për harmonizimin e gjendjeve, u miratua edhe Raporti për regjistrimin vjetor të inventarit (pajisje dhe lloje të tjera të materialeve) për vitin 2025. Komisioni Shtetëror i Zgjedhjeve vazhdon të veprojë si garant i mbrojtjes së proceseve demokratike, duke konfirmuar se respektimi i plotë i parimeve të transparencës dhe përgjegjësisë mbetet bazë për çdo vendim të miratuar.

KOMISIONI SHTETËROR I ZGJEDHJEVE

Anëtarët e Komisionit Shtetëror të Zgjedhjeve (KSHZ) zhvilluan një takim pune me përfaqësues të Fondacionit Ndërkombëtar për Sisteme Zgjedhore (IFES), në të cilin u konfirmua gatishmëria për të vazhduar dhe thelluar bashkëpunimin në kuadër të programit “Mbështetje për zgjedhjet në Maqedoninë e Veriut”.

Drejtoresha e Zyrës në Republikën e Maqedonisë së Veriut, Joana Kosma, theksoi se bashkëpunimi me KSHZ-në përmes projektit të Qeverisë së Zvicrës, “Programi për mbështetjen e zgjedhjeve në Maqedoninë e Veriut”, deri më tani ka rezultuar me arritje konkrete dhe të matshme, veçanërisht në fushën e zhvillimit të zgjidhjeve të TI-së, forcimit të kapaciteteve institucionale, përmirësimit të proceseve zgjedhore dhe rritjes së besimit të qytetarëve në to.

Kryetari i Komisionit Shtetëror të Zgjedhjeve, Bojan Mariçiq, theksoi se gjatë mandatit të tij, përparësi do të jenë forcimi i kredibilitetit dhe i dukshmërisë së Komisionit, si dhe hapja e tij ndaj qytetarëve. Në këtë drejtim, ai tha se përbërja e re e Komisionit do të vazhdojë me proceset reformuese me një fokus qartë të përcaktuar në prioritetet kryesore strategjike, ndër të cilat u theksua nevoja për vënien në funksion të Qendrës për Trajnim të Vazhdueshëm të KSHZ-së. Mariçiq theksoi se Qendra e Trajnimeve tashmë ka bazë të vendosur ligjore dhe se në periudhën e ardhshme, në bashkëpunim me IFES-in, do të bëhen përpjekje për funksionalizimin e saj të plotë operativ, duke përfshirë edhe sigurimin e stafit përkatës.

Gjatë diskutimit, nënkryetari i KSHZ-së, Abdush Demiri, u ndal te rëndësia e burimeve njerëzore dhe e edukimit të vazhdueshëm si element kyç për qëndrueshmërinë e reformave. Në takim, anëtarët e Komisionit, të cilët edhe në përbërjen e mëparshme kanë marrë pjesë në punën e KSHZ-së, i ndanë përvojat e deritanishme nga bashkëpunimi me IFES-in, duke theksuar rëndësinë e ndërtimit mbi rezultatet e arritura dhe sigurimit të vazhdimësisë në proceset reformuese.

Në takim u konstatua bashkërisht se partneriteti ndërmjet KSHZ-së dhe IFES-it mbetet strategjik edhe në periudhën e ardhshme, me qëllim përmirësimin e proceseve zgjedhore dhe forcimin e besimit të qytetarëve në sistemin zgjedhor.

KOMISIONI SHTETËROR I ZGJEDHJEVE

Me dhënien e deklaratës solemne në Kuvendin e Republikës së Maqedonisë së Veriut, zyrtarisht filloi mandati i anëtarëve të sapozgjedhur të Komisionit Shtetëror të Zgjedhjeve. Sipas vendimit për zgjedhjen e kryetarit, nënkryetarit dhe anëtarëve të Komisionit Shtetëror të Zgjedhjeve, nr. 08-627/1, të miratuar më 28 janar 2026, Kuvendi zgjodhi Bojan Mariçiqin për kryetar, Abdush Demirin për nënkryetar, ndërsa për anëtarë të Komisionit u zgjodhën Aleksandar Dashhevski, Angelço Ristov, Svetllana Karapetrova, Boris Kondarko dhe Ditmire Shehu.

Kryetari i ri i Komisionit Shtetëror të Zgjedhjeve, Bojan Mariçiq, është jurist i diplomuar në degën e së drejtës ndërkombëtare në Fakultetin e Drejtësisë “Justiniani i Parë” në Shkup dhe magjistër i së drejtës evropiane dhe ndërkombëtare, i cili ka një përvojë të pasur institucionale, duke përfshirë detyrat si ministër i Drejtësisë dhe zv/kryeministër për çështje evropiane.

Komisioni Shtetëror i Zgjedhjeve ka shtatë anëtarë, të cilët sipas dispozitave ligjore duhet të jenë qytetarë të Republikës së Maqedonisë së Veriut me banim të përhershëm në vend, të kenë arsim të lartë me të paktën tetë vjet përvojë pune dhe të mos jenë anëtarë të organeve të partive politike. Mandati i anëtarëve të Komisionit është pesë vjet, me të drejtë rizgjedhjeje.

Përbërja e re e Komisionit Shtetëror të Zgjedhjeve u votua nga deputetët, me 83 vota “pro” dhe asnjë votë “kundër”, pasi mandati i anëtarëve aktualë të Komisionit Shtetëror të Zgjedhjeve skadoi më 15 janar të këtij viti, i cili u zgjat për shkak të zbatimit të zgjedhjeve të përsëritura lokale në katër komuna.

Komisioni Shtetëror i Zgjedhjeve mbetet i përkushtuar ndaj rolit të tij kushtetues dhe ligjor në sigurimin e proceseve zgjedhore të drejta, të lira dhe demokratike, në interes të qytetarëve dhe zhvillimit demokratik të shtetit.

KOMISIONI SHTETËROR I ZGJEDHJEVE