Kryetari i Komisionit Shtetëror të Zgjedhjeve (KSHZ), Bojan Mariçiq, dhe anëtarët e Komisionit, realizuan një takim pune me Ministrin e Administratës Publike, Goran Minçev, në të cilin u theksua përkushtimi i përbashkët për avancimin e bashkëpunimit ndërinstitucional dhe forcimin e kapaciteteve të administratës zgjedhore, si parakushte kryesore për zbatimin e suksesshëm të veprimeve zgjedhore dhe sigurimin e rezultateve kredibile zgjedhore.
Fokus i veçantë i takimit iu kushtua zgjedhjes së ardhshme të përbërjeve të reja të Komisioneve Komunale të Zgjedhjeve (KKZ). Nga ana e anëtarëve të KSHZ-së u theksua se për zbatimin e suksesshëm të këtij procesi, rëndësi esenciale ka posedimi i një Regjistri të përditësuar dhe të saktë të nëpunësve administrativë, si bazë kryesore për përzgjedhjen e kuadrit të kualifikuar dhe profesional për organet zgjedhore.
Ministri Minçev konfirmoi gatishmërinë e tij dhe theksoi se Ministria është plotësisht në dispozicion të Komisionit Shtetëror të Zgjedhjeve për shkëmbim të shpejtë dhe efikas të të dhënave, me qëllim që administrata publike të vazhdojë të jetë garant i zgjedhjeve transparente dhe efikase.
Bashkëbiseduesit u pajtuan se ky koordinim i drejtpërdrejtë dhe qasje partneriteti janë thelbësore për zbatimin efikas të detyrimeve ligjore dhe për funksionimin e pandërprerë të organeve zgjedhore.
Komisioni Shtetëror i Zgjedhjeve mbetet i fokuasuar në kompletimin me kohë dhe edukimin e administratës zgjedhore, duke siguruar zbatim profesional të zgjedhjeve dhe forcimin e besimit të qytetarëve në të gjithë procesin.
KOMISIONI SHTETËROR I ZGJEDHJEVE
