Денеска, 31 јануари 2024 година, Државната изборна комисија оствари средба со Министерот за внатрешни работи, Панче Тошковски.
Состанокот помина во конструктивна атмосфера и двете страни изразија подготвеност за продолжување на соработката во насока на организирање и спроведување на фер и демократски избори.
ДРЖАВНА ИЗБОРНА КОМИСИЈА
Државната изборна комисија согласно Пресудата на Апелационен суд ГЖ-1639/23 од 27.12.2023 година го објавува следното:
Во организација на Советот на Европа – Оддел за избори и партиципативна демократија, на крајот на месец ноември во Стразбур се одржа меѓународна конференција на тема „Улогата на центрите за обука за избори“ во подобрувањето на изборните процеси и изборите.
Во текот на Конференцијата, говорниците и учесниците, меѓу другото, ги споделија своите искуства и најдобри практики, разговараа за тоа како би можеле да бидат структурирани центрите за обука за избори, која е нивната улога, мисија и ресурси. Тие, исто така, разговараа и за важноста и влијанието на обуките врз изборната средина и културниот развој, како може да се спроведат политиките за обука, главните предизвици, глобалните трендови и технологии во изборниот процес, како и размена на главните перспективи за зајакнување на соработката на овие полиња меѓу земјите-членки на Советот на Европа.
Државната изборна комисија учествуваше на оваа Конференција преку своја претставничка. На панел сесија претставничката на ДИК го презентираше напредокот на Државната изборна комисија во последните две години, во насока на формирање на центар за обуки за избори. Преку презентацијата таа даде осврт на целокупниот процес, почнувајќи од реализацијата на студијата за изводливост, преку патоказот и акцискиот план, изготвувањето на сите потребни документи, па се до поднесувањето на предлог-измените на Изборниот законик, со кои се предвидува формирање на ваков центар.
Изборните органи играат клучна улога во обезбедувањето на правилно функционирање на демократските институции. Почитувањето на принципите на независност, интегритет, транспарентност и ефикасност е од клучно значење за нив, заедно со обезбедувањето професионална обука за членовите на изборната администрација и другите засегнати страни вклучени во изборниот процес. Ова беше истакнато и а време на четвртиот Самит на Советот на Европа, каде шефовите на држави ја нагласија потребата од враќање на довербата во изборните процеси и спроведување на избори според меѓународни стандарди.
ДРЖАВНА ИЗБОРНА КОМИСИЈА
Делегација на Државната изборна комисија и Меѓународната фондација за изборни системи (ИФЕС) ги набљудуваше општите избори во Холандија.
Предвремените општи избори се одржаа на 22 ноември 2023 година за да се изберат членовите на Претставничкиот дом .
Согласно холандскиот изборен закон, изборите за Претставничкиот дом се одржуваат на секои четири години во март, освен ако не се распишат предвремени избори. 150-те членови на Претставничкиот дом се избираат на отворени листи, со пропорционален модел.
Набљудувањето на иѕборите се реализираше со поддршка на Меѓународната фондација за изборни системи (ИФЕС).
ДРЖАВНА ИЗБОРНА КОМИСИЈА
Генералното собрание и пленарна конференција на Меѓународната женска асоцијација за изборна администрација (WEM-International) се одржаа во Прага, Чешка Република, на 8-9 ноември 2023 година.
Статутарниот собир, организиран од ИФЕС Украина со поддршка на Регионалната европска канцеларија на ИФЕС, собра истакнати претставници на изборните органи од 18 земји од целиот свет, меѓу кои и претставничка од Државната изборна комисија.
Учесниците разменија најдобри практики за интегрирање на родовите перспективи во работата на изборните органи, споделувајќи инспиративни искуства од женското лидерство во изборната администрација. На настанот и нови изборни органи се приклучија на членството во WEM-International, а беше избрано и Раководството на Извршниот комитет. Учесниците заеднички ја развија стратешката визија на здружението за следните две години.
Во текот на настанот беше организирана и работилница „Сојузници за еднаквост“ од страна на RENEWE – Regional European Network for Empowering Women in Elections.
Низ повеќе интерактивни сесии учесничките стекнуваа знаења и вештини околу справување со различни видови родово базирано насилство, и пружање поддршка на жртви на такво насилство, особено во онлајн просторот.
ДРЖАВНА ИЗБОРНА КОМИСИЈА
Државната изборна комисија учествуваше на годишниот состанок на Мрежата за изборна правда (Electoral Justice Network) кој се одржа во Париз на 17 октомври.
На состанокот се дискутираше за предизвиците со кои се соочуваат изборните органи и административните судови при одржувањето на интегритетот на изборите, како и за важноста на транспарентноста при финансирањето на изборните кампањи.
ДРЖАВНА ИЗБОРНА КОМИСИЈА
Во текот на септември и октомври 2023 година, Државната изборна комисија организираше и спроведе обуки за унапредување на родовата сензитивност на сертифицираните обучувачи на ДИК, насловени „Родовите аспекти на изборниот процес“.
На обуките се разработија темите родова еднаквост, родова пристрасност, стереотипи и предрасуди, родова еднаквост и избори, изборен процес и учество на жените, важноста на родово разделените податоци, рамка на изборни права и политика на Државната изборна комисија против сексуално вознемирување.
Обуките опфатија вкупно 106 учесници – 88 % од вкупниот број на сертифицирани обучувачи на Државната изборна комисија, од кои 52 мажи и 54 жени кои спроведуваат обуки на членовите на изборните органи на пониско ниво.
За да се обезбеди ефективна организација и ангажман, учесниците беа поделени во пет групи, од кои секоја се состоеше од приближно 20 до 25 лица. Сите овие групи беа внимателно избалансирани во однос на полот и географскиот регион, со цел да се промовира различноста и инклузивноста.
Темата за родова еднаквост и родовите аспекти на изборите беше воведена за прв пат оваа година како тема за обучувачите на Државната изборна комисија и имаше многу позитивно влијание. Таа беше оценета како многу корисна, со потреба да се повторува на одреден период, особено по изборите.
ДРЖАВНА ИЗБОРНА КОМИСИЈА
Стручната служба на Државната изборна комисија присуствуваше на еднодневна обука „ Информираност за сајбер – хигиена“ која се одржа на 24, 25 и 26 октомври 2023г. во организација на Меѓународната фондација за изборни системи ( ИФЕС).
На обуката вработените во ДИК се запознаа со техниките на подобрување на сајбер – хигиената и оддржување на сајбер безбедноста како и се стекнаа со знаења за обезбедување на комуникациите и коресподенцијата, обезбедување на корисничките сметки, креирање на безбедна организациска политика.
Оваа обука е дел од тековната соработка на Државната изборна комисија со ИФЕС со цел унапредување на практичните знаења и вештини на стручниот кадар на ДИК на централно и подрачно ниво.
ДРЖАВНА ИЗБОРНА КОМИСИЈА
Денес, Претседателот на Државната изборна комисија, Александар Даштевски учествуваше на семинарот „ Набљудување на изборите и проценка на изборната админситрација кој се одржува во Виена, Австрија, во организација на ОДИХР.
Во своето обраќање на тема „ Успесите и предизвиците во предлагањето и спроведувањето на изборните реформи во Северена Македонија“, претседателот Даштевски се осврна на покрупните изборни реформи што ги има имплементирано ДИК во последните години. Тој го презентираше искуството со воведување на уредите за биометриска идентификација како и резултатите од спроведената реформа, реализацијата на обуките за избирачките одбори како и интегрирањето на родовите аспекти во работењето на ДИК. Исто така, Даштевски го презентираше и планот за формирање на Центар за обуки за избори кој што треба да почне да функционира до пролетта 2024 година.
Даштевски се осврна и на соработката со ОБСЕ и поддршката која ДИК ја добива од оваа организација особено во напорите за спроведување на изборните реформи. Тој потенцираше дека Државната изборна комисија континуирано ги следи препораките на ОБСЕ кои се однесуваат на изборните процеси, законската рамка и изборниот систем, изборната администрација, регистрација на гласачи, регистрација на кандидати, кампања и финансирање на кампања, медиуми, приговори и жалби, граѓански и меѓународни набљудувачи како и препораки за процесот на гласање на денот на изборите. „Исто така, со помош на ОБСЕ во 2021 година донесовме нов Деловник за работа на ДИК како и Правилник за работа на помошното тело кое ДИК го ангажира за време на избори што е особено значајно за унапредување на работата на институцијата и администрацијата. Се заблагодаруваме на ОБСЕ за досегашната соработка и очекуваме истата да продолжи уште поинтензивно и во наредниот период.“ – истакна претседателот Даштевски.
Обраќањето на Даштевски на семинарот во Виена беше во рамки на сесијата„ Улогата на телата кои управуваат со изборите и другите телата кои управуваат со изборите и другите чинители во имплементација на клучните принципи за изборната администрација “.
ДРЖАВНА ИЗБОРНА КОМИСИЈА
На 12 октомври 2023 година, во организација на Агенцијата за аудио и аудиовизуелни медиумски услуги, со поддршка на Канцеларијата за демократски институции и човекови права (ОДИХР), беше промовиран Кодексот за однесување во онлајн просторот за време на изборни процеси и референдуми.
На настанот свои видувања за Кодексот, а во име на Државната изборна комисија (ДИК), изложи Борис Кондарко, член на ДИК.
„Доаѓањето на дигиталната ера го револуционизираше начинот на кој општествата се занимаваат со политика и избори. Онлајн платформите, социјалните медиуми и дигиталната комуникација станаа суштински алатки за политички кампањи, ангажирање на гласачите и ширење информации.
Иако е важно регулирањето на онлајн просторот за време на изборите, од суштинско значење е да се одржуваат принципите на слободата на говорот. Постигнувањето на вистинската рамнотежа помеѓу заштитата на изборниот интегритет и заштитата на демократските вредности е деликатна задача. Сите како институции треба да мора да гарантираме дека регулативите се приспособени за да се справат со конкретни закани без да го задушат легитимниот политички дискурс.
Предизвикот за сите нас лежи токму во изнаоѓањето на вистинската рамнотежа помеѓу регулативата и слободата на говорот, обезбедувајќи изборите да останат фер, транспарентни и со доверба од електоратот.“ – посочи Кондарко.
На настанот беше презентиран и начинот на функционирање и улогата на Координативното тело кое ќе го следи почитувањето на начелата и стандардите посочени во Кодексот од страна на политичките партии, нивните кандидати, независните кандидати, интернет изданијата на радиодифузерите, онлајн медиумите, проверувачите на факти, инфлуенсерите и други субјекти кои можат да извршат влијание врз јавноста во функција на кампања за време на избори или референдуми.
Кодексот е изготвен на иницијатива на АВМУ во соработка со релевантните институции од областа – Здружението на новинари на Македонија, Македонскиот институт за медиуми, Советот за етика во медиумите, Институтот за комуникациски студии и Фондацијата Метаморфозис. Принципите и стандардите пропишани во Кодексот се од етичка природа, поради што неговото почитување е на доброволна основа, со потпишување Пристапница.
ДРЖАВНА ИЗБОРНА КОМИСИЈА
Членови на Државната изборна комисија, минатата недела учествуваа на регионалната конференција „ Јакнење на ефикасноста на изборната администрација во Западен Балкан“ што се одржа во Сараево, Босна и Херцеговина, во организација на ОДИХР и ОБСЕ мисијата во Босна и Херцеговина.
Во своето обраќање, претседателот на ДИК, Даштевски се осврна на поголемите изборни реформи што се случија во последните години во Македонија.
Даштевски ги презентираше искуството и предизвиците со кои се соочуваше ДИК при воведување на уредот за биометриска идентификација на гласачите во постапката за гласање, важноста на интегрирањето на родовите аспекти во работењето на ДИК во насока на отпочнување на процесот на родова сензибилизација, обуките за изборната администрација како и плановите за формирање на Центарот за обуки.
„Основната цел на Стратешкиот план на ДИК за периодот 2021-2024 година е да постави среднорочна, четиригодишна стратегија за унапредување на работата на ДИК преку одржување на кредибилен изборен систем, континуирано унапредување на изборниот процес и постојана поддршка на сите учесници во изборите во остварувањето на нивните избирачки права. Од него произлезе развивањето на Родовиот акциски план на ДИК, во соработка со Мисијата на ОБСЕ во Скопје“ – истакна претседателот Даштевски.
Обраќањето на претседателот Даштевски беше во рамки на сесијата „ Улогата на органите за управување со изборите при изборни реформи и нивно следење: Предизвици и научени лекции“.
ДРЖАВНА ИЗБОРНА КОМИСИЈА
Денеска, 4 септември 2023 година, Државната изборна комисија склучи Меморандум за соработка зо Здружението за европска социјална инклузија ЕСИ НЕЛИС од Скопје.
Цел на овој Меморандум за соработка е зголемување на поддршката за слепите лица и лицата со визуелна попреченост во сите сегменти и фази на изборниот процес при остварување на изборните права, како и унапредување на работата на изборната администрација за создавање на услови за градење на инклузивен изборен систем и успешно спроведување на инклузивни избори.
Двете страни се согласија дека координирано ќе работат на заемна поддршка, соработка и учество во подготовка и имплементација на стратегии, програми и проекти за создавање на услови за пристапни и достапни изборни процеси за слепите лица и лицата со визуелна попреченост.
ДРЖАВНА ИЗБОРНА КОМИСИЈА
Денес, во просториите на Државната изборна комисија се потпиша Меморандум за разбирање меѓу Државната изборна комисија и Мисијата на ОБСЕ во Скопје, за спроведување на заедничките активности во периодот 2023 – 2026 година.
Со овој Меморандум, двете страни се согласуваат на меѓусебна соработка за понатамошно зајакнување на изборниот процес, обезбедување на меѓународна и домашна експертиза за спроведување на заеднички активности, размена на добри практики и соработка со други изборни комисии и чинители, организирање на обуки и развивање на материјали за обуки.
На средбата, претседателот Александар Даштевски и присутните членови на Државната изборна комисија разговараа со Амбасадорот Килиjан Вал, шеф на Мисијата на ОБСЕ во Скопје, за предизвиците со кои се соочува ДИК, за изборните реформи и воопшто за унапредување на изборните процеси во државата.
ДРЖАВНА ИЗБОРНА КОМИСИЈА
На ден 10.07.2023 година претставници на Државната изборна комисија земаа активно учество на онлајн состанок кој служеше како воведна сесија во Програмата за Меѓународно сертифицирање за управување со ризик од корупција-МСУРК (International Certificate in Corruption Risk Management- ICCRM) на Овластениот институт за јавни финансии и сметководство (Chartered Institute of Public Finance and Accountancy-CIPFA) како дел од програмата за спречување корупција, развиена во соработка со Канцеларијата на обединетите нации, а подржана од Меѓународната фондација за изборни реформи ИФЕС.
Програмата има за цел зајакнување на капацитетите на институциите во државата и истата е насочена кон спроведување, управување и следење на спроведувањето на ризиците од корупција и плановите за интегритет на ниво на држава во сите субјекти од јавниот сектор.
Оваа програма ќе се реализира во периодот од месец јули до месец декември 2023 година.
ДРЖАВНА ИЗБОРНА КОМИСИЈА
Претседателот на Државната изборна комисија, Александар Даштевски, учествуваше на дводневната тркалезна маса на тема: ,,Дигитализација на изборниот процес: перспективи на сајбер безбедноста и меѓуинституционалната соработка во Западен Балкан”, која се одржа од 6 до 7 јули оваа година.
Учесниците ги изложиjа своите искуства од областа на дигитализацијата, конкретните сајбер закани со кои се соочиле, како и ефективните мерки кои ги преземале.
Настанот беше во организација на Меѓународна ИДЕА, а се одржа во Тирана, Албанија.
ДРЖАВНА ИЗБОРНА КОМИСИЈА
Државната изборна комисија ја известува јавноста дека поради дефект во напојувањето со електрична енергија во моментов не функционираат службените меил адреси и други услуги поврзани со напојувањето.
Дефектот е во целата зграда каде што е седиштето на ДИК, во која се сместени и повеќе други државни институции. Истиот трае веќе неколку дена, од 7 април. ЕВН работи на негово отстранување, кое, според најавите, ќе потрае. За враќањето во функција на меил адресите и останатите услуги ќе објавиме дополнително соопштение.
ДРЖАВНА ИЗБОРНА КОМИСИЈА
Во организација на Меѓународната фондација за изборни системи ИФЕС, од 15 до 17 март во Скопје се одржа BRIDGE работилница на тема Едукација на гласачи и граѓани.BRIDGE е кратенка за „градење на ресурсите во демократијата, владеењето и изборите“, претставува глобална програма и го содржи најсеопфатниот курикулум од областа на изборите.
Преку посебно креирана методологија, на оваа работилница учесниците стекнаа знаења и вештини за дизајнирање на програми за едукација и информирање на граѓани и гласачи.
Покрај учесниците од Државната изборна комисија, на работилницата учествуваа и претставници од Агенцијата за аудио и аудиовизуелни медиумски услуги, Државната комисија за спречување корупција, Народниот правобранител, политички партии и граѓански организации.
ДРЖАВНА ИЗБОРНА КОМИСИЈА
На 14 март Државната изборна комисија учествуваше на настан организиран од Националниот демократски институт НДИ: Изборни реформи во Северна Македонија.
Настанот го отвори министерот за правда, г. Кренар Лога, а претставници од над 15 клучни институции, домашни и меѓународни организации и политички партии дискутираа за капацитетите за спроведување на препораките на ОБСЕ/ОДИХР и резултатите од евентуални изборни реформи.
ДРЖАВНА ИЗБОРНА КОМИСИЈА
На 15 март Државната изборна комисија оствари средба со Шефот на Мисијата на ОБСЕ, амбасадорот Килијан Вал. Теми на состанокот беа функционирањето на ДИК и потребата од изборни реформи, особено имплементацијата на препораките на ОБСЕ/ОДИХР. Распределба на доволно ресурси e од витално значење за работата на ДИК.
Шефот на Мисијата понуди засилено партнерство со ДИК и блиска соработка со цел да се постигне добро функционален изборен систем во согласност со највисоките меѓународни стандарди.
ДРЖАВНА ИЗБОРНА КОМИСИЈА
Во Ресурсниот центар за родово одговорно креирање на политики и буџетирање, Министерството за труд и социјална политика започна со спроведување циклус обуки за вработените во јавниот сектор. На 6 и 7 март се одржа основна обука за род, родова еднаквост и воведување на родова перспектива во јавните политики.
Се обработуваа и теми за циклусите на креирање на јавни политики, стратегии за застапување на родова еднаквост во тие процеси како и родовата статистика.
На обуката учествуваат и вработени во Стручната служба на Државната изборна комисија.
Стекнатите знаења ќе ги применат во својата работа во иднина.
ДРЖАВНА ИЗБОРНА КОМИСИЈА
Адреса: ул. Св. Кирил и Методиј бр. 54
Телефон: +389 02 3 244 744
Е-маил: [email protected]
www: https://sec.mk
Copyright © 2023 | State Election Commission
Оваа веб страница / платформа е изработена во рамките на проектот „Поддршка на изборни реформи” на Владата на Швајцарија, имплементиран од Меѓународната фондација за изборни системи (ИФЕС). Искажаните ставови, мислења и содржини во оваа веб страница / платформа не мора да ги отсликуваат ставовите на донаторот, проектот или имплементаторот.
