Me trajnimin me temë „Identifikimi, vlerësimi dhe menaxhimi i rreziqeve nga korrupsioni“, të dedikuar për anëtarët dhe t; punësuarit e Komisionit Shtetëror të Zgjedhjeve, dhe të organizuar në bashkëpunim e me mbështetjen e Misionit të OSBE-së në Shkup, zyrtarisht filloi faza e parë praktike e hartimit të Regjistrit të rreziqeve nga korrupsioni të KSHZ-së.

Në fjalimin e tij hyrës, kryetari i KSHZ-së, Bojan Mariçiq, theksoi se përballja me këtë sfidë komplekse shoqërore është një çështje jashtëzakonisht aktuale, veçanërisht mbrojtja e administratës zgjedhore nga ndikimet korruptive. Ai potencoi se mbrojtja më e mirë e KSHZ-së nuk është reagimi pasi lëshimi të ketë ndodhur, por krijimi i një sistemi të qëndrueshëm të brendshëm përmes parandalimit të saktë.  Duke iu referuar praktikës ndërkombëtare, Mariçiq tha se „qëndrueshmëria e trupave zgjedhorë nuk matet vetëm me gatishmërinë e tyre teknike për zbatimin e zgjedhjeve, por me aftësinë e tyre për të parashikuar dhe neutralizuar paraprakisht rreziqet e brendshme dhe të jashtme ndaj integritetit të tyre“

Ai shprehu falënderim të veçantë për Misionin e OSBE-së në Shkup dhe ambasadorin, SH.T. Kilian Vall për mbështetjen afatgjatë, si dhe për kryetarin e KSHPK-së (Komisionit Shtetëror për Parandalimin e Korrupsionit), z. Adem Çuçul, duke theksuar se kohezioni ndërinstitucional konfirmon përkushtimin e përbashkët për tolerancë zero ndaj rreziqeve korruptive.

Në këtë ngjarje, shefi i Misionit të OSBE-së në Shkup, ambasadori Vall, theksoi se mbështetja e zgjedhjeve të lira, demokratike dhe gjithëpërfshirëse është një nga angazhimet themelore të OSBE-së, ndërsa bashkëpunimi i deritanishëm me KSHZ-në dhe KSHPK-në tashmë ka sjellë rezultate konkrete në avancimin e integritetit zgjedhor. Ai theksoi se hartimi i Regjistrit të rreziqeve nga korrupsioni përfaqëson një mjet praktik dhe të qëndrueshëm që duhet të dëshmohet në praktikë.

“Hartimi i Regjistrit të rreziqeve nga korrupsioni nuk është thjesht një ushtrim teknik, por edhe një investim i rëndësishëm në qëndrueshmërinë institucionale, transparencën dhe besimin e publikut.”, tha ambasadori Vall.

Hartimi i këtij dokumenti strategjik, i cili synon të ndërtojë një qëndrueshmëri afatgjatë dhe një sistem imunitar të brendshëm të institucionit përmes parandalimit të saktë dhe mapimit të çdo pike të ndjeshme në procedurat operative, po zhvillohet nën mentorimin e ekspertes, znj. Aneta Arnaudovska, përvoja profesionale e së cilës është një garanci e plotë se specifikat e punës së KSHZ-së do të pasqyrohen në një dokument me standardet më të larta ndërkombëtare.

Ky aktivitet, ku mysafirë ishin edhe përfaqësuesit nga Komisioni Shtetëror për Parandalimin e Korrupsionit, pason mbështetjen afatgjatë nga ana e Misionit të OSBE-së dhe është pjesë e Politikës së Integritetit, ku progresi i KSHZ-së është real dhe i matshëm.

Treguesit zyrtarë konfirmojnë një rritje serioze në harmonizimin e Komisionit me politikat antikorrupsion, e cila nga 61% në vitin 2023 është rritur në 73% në vitin 2025.

Trajnimi, i cili u moderua nga Natalia Rusu, shefe e Departamentit të Demokratizimit pranë Misionit të OSBE-së në Shkup, në pjesën e saj të punës përfshiu edhe simulime praktike për identifikimin e proceseve dhe nënproceseve, si dhe diskutim mbi avantazhet e vendosjes së standardit ndërkombëtar ISO 37001. Me këtë hap, KSHZ-ja dërgon një mesazh të qartë se parandalimi dhe llogaridhënia janë një angazhim praktik i përditshëm i institucionit.

KOMISIONI SHTETËROR I ZGJEDHJEVE

Më datë 22.05.2026, Komisioni Shtetëror i Zgjedhjeve mbajti seancën e 7-të në të cilën, në prani të gjashtë anëtarëve, u miratua në mënyrë unanime rendi i ditës i përbërë nga katër pika, të cilat kanë të bëjnë me avancimit të punës kadrovike dhe tekniko-logjistike të institucionit.

Në përputhje me rendin e ditës, u miratua Rregullorja për ndryshimin dhe plotësimin e Rregullores për sistematizimin e vendeve të punës në Shërbimin profesional të Komisionit Shtetëror të Zgjedhjeve, për të cilën kryetari Bojan Mariçiq arsyetoi se këto ndryshime përbëjnë një hap drejt realizimit së Planit vjetor të punësimit për vitin 2026, me qëllim fuqizimin e kapaciteteve kadrovike dhe rritjen e efikasitetit në funksionimin e përditshëm të institucionit.

Anëtarët e KSHZ-së miratuan gjithashtu Vendimin për ndryshimin dhe plotësimin e Planit vjetor të nevojave të përgjithshme për prokurime publike për vitin 2026. Për sa i përket kësaj pike, fjalën e mori anëtari i Komisionit, Angellço Ristov, i cili shpjegoi se këto ndryshime realizohen pas kërkesave të dorëzuara nga sektori i TI-së pranë Komisionit Shtetëror të Zgjedhjeve. Ai arsyetoi me detaje se brenda planit përfshihen prokurime të reja për materiale harxhuese kompjuterike, licenca, softuer antivirus, si dhe softuerin vMix për përcjelljen e seancave me përkthim shumëgjuhësh. Gjithashtu, përmes këtyre ndryshimeve parashikohet mirëmbajtje preventive dhe adaptive e sistemit DMS, e pajisjeve për furnizim të pandërprerë me energji (UPS) dhe e kondicionerëve në sallën e serverëve, si dhe prokurim i licencave dhe mbështetjes për pajisjen e rrjetit Firewall-SonicWall. Siç theksoi Ristov, të gjitha ndryshimet e lartpërmendura realizohen me qëllim të rritjes së funksionalitetit, sigurisë dhe mirëmbajtjes së sistemit të TI-së pranë Komisionit Shtetëror të Zgjedhjeve.

Të gjitha vendimet e seancës së 7-të u miratuan në mënyrë unanime nga anëtarët e pranishëm.

KOMISIONI SHTETËROR I ZGJEDHJEVE

Nënkryetari i Komisionit Shtetëror të Zgjedhjeve, Abdush Demiri, dhe anëtarja e Komisionit, Svetllana Karapetrova, morën pjesë aktive në konferencën ndërkombëtare me temë „Teknologjitë e reja dhe integriteti zgjedhor në Bosnjë dhe Hercegovinë: roli, kufizimet dhe përgjegjësia“, e cila u mbajt në Asamblenë Parlamentare të Bosnjës dhe Hercegovinës në Sarajevë.

Në kuadër të tre paneleve të punës, përfaqësuesit e Komisionit Shtetëror të Zgjedhjeve të Republikës së Maqedonisë së Veriut, së bashku me kolegët e tyre nga Estonia dhe Shqipëria, si dhe me ekspertë vendas dhe ndërkombëtarë, ndanë përvojat, sfidat dhe kapacitetet institucionale të nevojshme për aplikimin dhe menaxhimin e suksesshëm të veglave digjitale gjatë votimit dhe përmbledhjes së rezultateve.

Nënkryetari i KSHZ-së, Abdush Demiri, ishte folës në panelin me titull „Teknologjia dhe besimi: Konteksti për forcimin e integritetit zgjedhor në BeH“, ku i ndau përvojën praktike të Maqedonisë së Veriut dhe theksoi se aplikimi e identifikimit biometrik të votuesve ishte një hap i rëndësishëm për rritjen e besimit të opinionit publik në procesin zgjedhor. Demiri theksoi se çelësi për forcimin e standardeve demokratike dhe mbrojtjen e votës së qytetarëve nuk qëndron vetëm te teknologjia, por edhe te qëndrueshmëria institucionale, përgatitja profesionale dhe kapaciteti i administratës zgjedhore për të menaxhuar me sukses proceset në terren. Në kuadër të diskutimit, Demiri konfirmoi gatishmërinë dhe transparencën e plotë të KSHZ-së për bashkëpunim profesional dhe ndarjen e njohurive praktike dhe eksperte me kolegët nga Bosnja dhe Hercegovina.

Pjesëmarrësit në konferencë u pajtuan se teknologjia është një vegël e fuqishme për reduktimin e manipulimeve zgjedhore, por që për sukses të plotë është i domosdoshëm komunikimi transparent me publikun dhe mbështetja e fortë nga të gjitha institucionet shtetërore.

Ngjarja, e cila u organizua nga Instituti Kombëtar Demokratik (NDI) në Bosnjë dhe Hercegovinë, me mbështetjen e Komisionit për Luftë Kundër Korrupsionit të Dhomës së Përfaqësuesve të Asamblesë Parlamentare të BeH-së, u hap solemnisht nga kryesuesi i Dhomës së Përfaqësuesve, Darko Babal, ndërsa u mbyll me një fjalim përmbyllës dhe mesazhe kryesore nga kryesuesi i Komisionit për Luftë Kundër Korrupsionit të APBeH-së, Branisllav Borenoviq.

KOMISIONI SHTETËROR I ZGJEDHJEVE

Komisioni Shtetëror i Zgjedhjeve (KSHZ) në seancën e sotme të 5-të miratoi Vendimin për ndarjen e mjeteve financiare për 11 Komisione Komunale Zgjedhore, me çka mundësohet pagesa e kompensimeve të mbetura për organet zgjedhore në komunat me xhirollogari të bllokuara.

Në kuadër të arsyetimit të Propozim-Vendimit, kryetari i Komisionit Shtetëror të Zgjedhjeve, Bojan Mariçiq, theksoi se ky Vendim i miratuar unanimisht është i dedikuar për kompensimet e organeve zgjedhore për Zgjedhjet Lokale të vitit 2025 dhe zgjedhjet e përsëritura për kryetarë të komunave të zbatuara në vitin 2026, me të cilin zgjidhet problemi me vonesën e pagesës për shkak të zhirollogarive të bllokuara të komunave. Ai theksoi se Vendimi është miratuar në bazë të konkluzionit të Qeverisë nga data 29.04.2026, me çka njëkohësisht konfirmohet përkushtimi dhe angazhimi i KSHZ-së për pagesën e plotë të të gjithë personave të përfshirë në zbatimin e proceseve zgjedhore.

Shuma e përgjithshme prej 107.201.924,00 denarë, e dedikuar për komunat Haraçinë, Dellçevë, Strugë, Pehçevë, Tetovë, Krivogashtan, Vasilevë, Zhelinë, Gostivar, Vrapçisht dhe Zërnovc, është siguruar nga mjetet buxhetore të shtetit, pas kërkesave dhe urgjencave të mëparshme të dorëzuara deri te Ministria e Financave nga ana e KSHZ-së për respektimin e plotë të nenit 88 paragrafi 5 të Kodit Zgjedhor. Pagesa ka të bëjë me kompensimet në pajtim me Rregulloren e KSHZ-së për Zgjedhjet Lokale të vitit 2025 dhe Zgjedhjet e përsëritura për kryetarë të komunave (viti 2026) në komunat ku janë zbatuar të njëjtat.

Mjetet do të transferohen sot në llogari të veçanta dedikuese të komunave për aktivitete zgjedhore, me çka garantohet realizimi i tyre për pagesën e kompensimeve të këshillave zgjedhorë dhe komisioneve komunale zgjedhore, përkundër zhirollogarive të bllokuara të komunave.

Me miratimin e këtij vendimi dhe me Rregulloren për ndryshimin dhe plotësimin e kritereve për kompensim (nr. 08-4741/1 të datës 14.11.2025), KSHZ-ja së bashku me palët e përfshira, tejkaloi me sukses sfidën shumëmujore me të cilën ballafaqoheshin një pjesë e komunave lidhur me pagesat e kompensimeve të organeve zgjedhore. Në këtë mënyrë sigurohet valorizimi i merituar i punës së mijëra qytetarëve të cilët ishin pjesë e administratës zgjedhore, duke mbrojtur dinjitetin e të gjithë atyre që në mënyrë profesionale i kryen detyrat e tyre.

Në seancën e sotme, përveç kësaj pike kyçe, Komisioni Shtetëror i Zgjedhjeve miratoi edhe Procesverbalin nga seanca e kaluar e 4-të, ndërsa në pikën “Të ndryshme” nuk pati diskutime shtesë.

KOMISIONI SHTETËROR I ZGJEDHJEVE

Kryetari i Komisionit Shtetëror të Zgjedhjeve (KSHZ), Bojan Mariçiq, dhe nënkryetari Abdush Demiri zhvilluan një takim pune me zëvendëskryeministrin e parë dhe ministrin për çështje evropiane, Bekim Sali, në të cilin u theksua përgjegjësia e përbashkët institucionale për avancimin e ambientit demokratik dhe për miratimin në kohë të ndryshimeve në Kodin Zgjedhor.

Udhëheqësia e KSHZ-së e informoi zëvendëskryeministrin e parë për aktivitetet aktuale dhe përparimin e arritur, të shënuar në Raportin e OSBE/ODIHR-it për Zgjedhjet Lokale 2025. Në kuadër të bisedës, KSHZ-ja theksoi nevojën për mbështetje ndaj propozim-ndryshimeve të Kodit Zgjedhor para zëvendëskryeministrit Sali, si një hap esencial për plotësimin e boshllëqeve ligjore dhe për harmonizim të plotë me rekomandimet ndërkombëtare të OSBE/ODIHR-it. Bashkëbiseduesit u pajtuan se këto reforma, të cilat përfshijnë plotësisht  rekomandimet e OSBE/ODIHR-it, janë kontribut i drejtpërdrejtë drejt përmbushjes e Agjendës Reformuese evropiane dhe janë në interes të qytetarëve dhe shtetit.

Zëvendëskryeministri i parë dhe ministri për çështje evropiane, Bekim Sali, në takim theksoi se Qeveria e ndjek me vigjilencë procesin e ndryshimeve të Kodit Zgjedhor dhe mbetet fuqimisht e përkushtuar për realizimin e reformave sipas dinamikës së paraparë, me qëllim forcimin e mëtejshëm të standardeve demokratike dhe sigurimin e kushteve për procese zgjedhore legjitime. Ai shtoi se mbështetja për propozimet e KSHZ-së për ndryshimin e Kodit Zgjedhor duhet të vijë nga të gjitha palët e interesuara dhe është kyçe në këtë proces, veçanërisht kur bëhet fjalë për ndryshime që fokusohen në integritetin operativ dhe efikasitetin administrativ gjatë zbatimit të zgjedhjeve.

Në takim, nënkryetari i KSHZ-së, Abdush Demiri, adresoi edhe sfidat aktuale të Komisionit, për të cilat pritet mbështetje në kohë dhe adekuate nga ana e Qeverisë, ndër të cilat edhe pagesa e kompensimeve për organet zgjedhore në komunat me xhirollogari të bllokuara.

Në fund të takimit, bashkëbiseduesit konfirmuan fokusin dhe përkushtimin e përbashkët për finalizimin e ndryshimeve ligjore deri në qershor  2026 dhe përmbushjen e obligimeve nga Agjenda e Reformave, të cilat sjellin deri në 4,2 milionë euro mjete nga BE-ja, të dedikuara për harmonizim të plotë me standardet evropiane.

KOMISIONI SHTETËROR I ZGJEDHJEVE

Kryetari i Komisionit Shtetëror të Zgjedhjeve, Bojan Mariçiq, së bashku me anëtarët e Komisionit, zhvilluan një takim pune me ambasadorin e Misionit të OSBE-së në Shkup, Sh.T. Kilian Vall. Takimi u zhvillua në frymën e konfirmimit të rezultateve të deritanishme, por edhe të përcaktimit të fushave ku do të forcohet bashkëpunimi, në prag të ndryshimeve të ardhshme ligjore.

Në takim, ambasadori Val shprehu vlerësim të lartë për Komisionin, duke theksuar se Komisioni Shtetëror i Zgjedhjeve është një institucion me besueshmëri të madhe dhe përfaqëson një histori suksesi në shtet. Ky vlerësim i lartë përputhet me konkluzionin e përbashkët se Raporti përfundimtar i OSBE/ODIHR-it është një pasqyrim objektiv dhe real i procesit zgjedhor të zbatuar me sukses, me çka përforcohet edhe më tej kredibiliteti i institucionit.

Në këtë kontekst, udhëheqësia e Komisionit theksoi se janë të vetëdijshëm për sfidat e evidentuara në Raportin e ODIHR-it për Zgjedhjet Lokale 2025, me ç’rast u nënvizua përkushtimi e fortë dhe angazhimi i veçantë në të cilin do të punohet në periudhën e ardhshme për implementimin e plotë të rekomandimeve të dhëna. Anëtarët e Komisionit e njoftuan ambasadorin për propozimet tashmë të dorëzuara në grupin e punës për ndryshime në Kodin Zgjedhor, duke theksuar se presin që këto propozime të pranohen në tërësi, me qëllim që të sigurohet efikasiteti operativ dhe shkalla më e lartë e sigurisë juridike të proceseve zgjedhore, duke respektuar ekskluzivisht standardet profesionale dhe ndërkombëtare.

Ambasadori Val konfirmoi se Misioni i OSBE-së do ta intensifikojë më tej mbështetjen për Komisionin Shtetëror të Zgjedhjeve, ndërsa bashkëbiseduesit u pajtuan se ky bashkëpunim i përforcuar do të jetë i orientuar drejt realizimit të qëllimeve strategjike kyçe për transparencë dhe gjithëpërfshirje më të madhe të sistemit zgjedhor.

Në këtë drejtim, aktivitetet e përbashkëta në periudhën e ardhshme do të fokusohen në finalizimin e Regjistrit të rreziqeve nga korrupsioni, si pjesë përbërëse e Politikës për integritet të institucionit, si dhe në aktivitete që kanë të bëjnë me edukimin në terren, me grupe të ndryshme të synuara.

Në fund të takimit, u shpreh falënderim për ambasadorin Val për përkushtimin e tij personal gjatë mandatit, me ç’rast u konkludua se mbështetja nga OSBE mbetet një shtyllë vitale për zhvillimin e mëtejshëm demokratik dhe harmonizimin e plotë të proceseve zgjedhore me standardet ndërkombëtare.

KOMISIONI SHTETËROR I ZGJEDHJEVE

Komisioni Shtetëror i Zgjedhjeve, më datë 16.04.2026, në përbërje të plotë mbajti seancën e 3-të, në të cilën në mënyrë unanime u miratuan disa akte kyçe të orientuara drejt avancimit të standardeve të brendshme të punës dhe forcimit të kapaciteteve institucionale.

Në kuadër të rendit të ditës u miratuan procedurat për punë jashtë orarit dhe pagesën e shtesave në pagë, si dhe procedura për mungesë nga hapësirat e punës, me çka institucioni formalizon praktikat pozitive të deritanishme dhe vendos mekanizma të saktë për evidencë dhe vlerësim të punës në përputhje me standardet bashkëkohore.

Si pikë e rendit të ditës u miratua edhe Plani Aksional për avancimin e perspektivës gjinore (PAGJ) 2026–2028, dokument strategjik për integrimin e parimeve të inkluzivitetit dhe për avancimin e kulturës institucionale, standardeve profesionale dhe inkluzivitetit të procesit zgjedhor në Republikën e Maqedonisë së Veriut.

Në drejtim të forcimit të gatishmërisë administrative, Komisioni miratoi edhe Programin për trajnimin e udhëheqësisë dhe të punësuarve në Komisionin Shtetëror të Zgjedhjeve, me Plan për trajnime nga fusha e mbrojtjes së të dhënave personale për vitin 2026. Ky akt buron nga detyrimet ligjore për harmonizim të plotë me legjislacionin vendor dhe Rregulloren Evropiane (GDPR).

Nën pikën “Të ndryshme”, kryetari i KSHZ-së, Bojan Mariçiq, e hapi çështjen e vonesave dhe pagesave jo të plota të kompensimeve për anëtarët e organeve zgjedhore për Zgjedhjet Lokale të vitit 2025 nga ana e një pjese të komunave. Në paraqitjen e tij, ai theksoi se, në përputhje me Kodin Zgjedhor, përgjegjësia për pagesën e këtyre mjeteve është detyrim ekskluziv i komunave dhe i Qytetit të Shkupit. Njëkohësisht, ai vuri në dukje se KSHZ-ja është organi i vetëm kompetent për miratimin e Rregullores për kompensime, prandaj çdo vendim i pavarur i autoriteteve lokale për revidimin e saj ose uljen e shumave është i pabazuar ligjërisht dhe i pavlefshëm.

Me qëllim tejkalimin e situatës në komunat me llogari të bllokuara, Komisioni tashmë ka ndërmarrë hapa konkretë dhe iu është drejtuar Ministrisë së Financave dhe Qeverisë për gjetjen e një mekanizmi të përshtatshëm për sigurimin e mjeteve të nevojshme. Mariçiq theksoi se Komisioni Shtetëror i Zgjedhjeve mbetet i angazhuar për tejkalimin e problemit dhe paralajmëroi koordinim shtesë me udhëheqësinë e BNJVL-së dhe kryetarët e një pjese të komunave, me qëllim të gjetjes së një zgjidhjeje të përbashkët për pagesën urgjente të kompensimeve dhe mbrojtjen e plotë të të drejtave ligjore dhe dinjitetit të të gjithë qytetarëve të përfshirë në procesin zgjedhor.

KOMISIONI SHTETËROR I ZGJEDHJEVE

Kryetari i Komisionit Shtetëror të Zgjedhjeve (KSHZ), Bojan Mariçiq, së bashku me anëtarët e Komisionit, Aleksandar Dashtevski dhe Boris Kondarko, morën pjesë në tryezën e rrumbullakët me temë: “Gatishmëria e institucioneve për t’iu përgjigjur ndërhyrjeve të huaja dhe manipulimit me informacione (SMMI): sfidat, koordinimi dhe hapat e ardhshëm”, e organizuar nga Instituti për Studime të Komunikimit (ISK).

Prania dhe përfshirja e udhëheqjes së KSHZ-së në këtë aktivitet e konfirmon përcaktimin strategjik të Komisionit për mbrojtjen   e besueshmërinë e proceseve zgjedhore nga ndikimet e jashtme dhe fushatat e dezinformimit. Në këtë aktivitet, ekspertë të lartë vendas dhe ndërkombëtarë, ndër të cilët edhe përfaqësues nga OSBE/ODIHR dhe Shërbimi i Komunikimeve i Qeverisë së Mbretërisë së Bashkuar, diskutuan për nevojën e mobilizimit shumë më herët para mbajtjes së vetë zgjedhjeve, duke theksuar domosdoshmërinë e përfshirjes së hershme të të gjitha institucioneve përkatëse. Ekspertja nga OSBE/ODIHR, Françeska Bogeri, theksoi se është e domosdoshme që institucionet të fillojnë monitorimin e këtyre dukurive shumë më herët, me qëllim që të mundësohet komunikim dhe koordinim në kohë.

Për Komisionin Shtetëror të Zgjedhjeve, ndërtimi i rezistencës ndaj ndikimeve të këtilla paraqet një element kyç në konsolidimin e kapaciteteve institucionale. Pjesëmarrja në diskutim mundësoi shkëmbimin e përvojave mbi modelin britanik „RESIST“ (RESIST), si dhe mbi modelet e koordinimit që mund të zbatohen në kontekstin kombëtar me qëllim mbrojtjen e vullnetit të lirë të qytetarëve dhe diskursit demokratik.

Ngjarja u organizua në kuadër të projektit “Forcimi i gatishmërisë operacionale të Qeverisë për t’iu përgjigjur SMIM në Maqedoninë e Veriut”, i mbështetur nga Ambasada Britanike në Shkup.

KOMISIONI SHTETËROR I ZGJEDHJEVE

Komisioni Shtetëror i Zgjedhjeve (KSHZ) shpreh shqetësim serioz në lidhje me vonesën dhe pagesën jo të plotë të kompensimeve për anëtarët e organeve zgjedhore për Zgjedhjet Lokale të vitit 2025 nga ana e disa komunave të Shkupit dhe u bën apel kryetarëve të komunave dhe Bashkësisë së Njësive të Vetëqeverisjes Lokale (BNJVL) për respektim konsekuent të dispozitave ligjore gjatë realizimit të këtyre pagesave.

Edhe pse mijëra qytetarë i kanë kryer detyrat e tyre në mënyrë profesionale, me përgjegjësi dhe në përputhje me standardet më të larta, është e papranueshme që ata ende të përballen me detyrime të parregulluara ose me përpjekje për të ulur në mënyrë të paligjshme shumat e parapra. Në këtë drejtim, KSHZ-ja deklaron qartë se çdo vendim me të cilin në mënyrë të pavarur revidohet lartësia e kompensimeve është juridikisht i pabazuar dhe i pavlefshëm.

Organi i vetëm kompetent për miratim të Rregullores për kompensime është Komisioni Shtetëror i Zgjedhjeve, në përputhje me nenin 31 të Kodit Zgjedhor. Ky akt është i detyrueshëm për të gjitha subjektet dhe zbatimi i tij selektiv përbën shkelje të drejtpërdrejtë të ligjit dhe rrënon dinjitetin e administratës zgjedhore.

Edhe pse pjesa më e madhe e komunave në vend i kanë përmbushur tashmë detyrimet e tyre ligjore, është shqetësuese fakti që një pjesë nga komunat e Shkupit ende po e vonojnë këtë procedurë, pavarësisht udhëzimeve në kohë për planifikimin e këtyre fondeve në buxhetet komunale që nga korriku i vitit të kaluar. Për më tepër, ju kujtojmë se në përputhje me nenin 88, paragrafi 4 i Kodit Zgjedhor, fondet për mbajtjen e zgjedhjeve lokale sigurohen nga buxhetet e komunave.

Me qëllim mbrojtjen e të drejtave të administratës zgjedhore, që është thelbësore për integritetin e çdo procesi zgjedhor, si dhe për të parandaluar shpenzimet shtesë në barrë të buxheteve komunale për shkak të padive tashmë të paralajmëruara nga anëtarët e organeve zgjedhore, KSHZ-ja inicon një takim urgjent koordinues me drejtuesit e BNJVL-së  dhe kryetarët e komunave të prekura, i cili pritet të mbahet gjatë kësaj jave me qëllim tejkalimin e problemeve dhe gjetjen e një zgjidhjeje të shpejtë për këtë çështje.

KOMISIONI SHTETËROR I ZGJEDHJEVE